اسلام آباد۔ 04 نومبر (اے پی پی) پاکستان و بوسنیا ہرزیگووینا امنا کرینو کہ مچ آ دنیا ٹی سلاہ درشانی نا آجوئی نا آڑاٹ مسلمان تا مذہبی جوزہ غاتے مجروح کننگ ءِ امنا کننگ مفک، وخت اس کہ بوسنیا، ہرزیگووینا نا پریذیڈنسی نا چیئرمین شفیق جعفرووچ پارینے کہ کشمیر اٹی انسانی حق انا خلاف ورزی تا باندات اہم ءِ، کشمیر نا ویل ءِ کشمیری الس نا است خواہی تا رداٹ ایسر کننگے۔ داخیال آتا درشانی ءِ چارشنبے نادے آ وزیراعظم عمران خان و بوسنیا، ہرزیگووینا نا پریذیڈنسی نا چیئرمین شفیق جعفرووچ اسیجائی پریس کانفرنس آن تران کرسا کریر۔ وزیراعظم عمران خان پارے کہ بوسنیا، ہرزیگووینا نا پریذیڈنسی نا چیئرمین شفیق جعفر ووچ انا پاکستان نا دورہ آ بننگ آ پبی خیرمقدم ءِ کیوہ۔90 ء نا دہائی ٹی بوسنیا نا شاری تا مشکل نا ساہت اٹی پاکستان نا الس پبی کمک ءِ کرے۔ ہڑتوم آ ملک آتا نیام اٹ دا معاہدہ غاتیان تعلقداریک پین سوگو مریرہ۔ ہڑتوم آ ملک آتا نیام اٹ واپار نا کچ 4.5 ملین یورو ءِ، نن دادے پین ودفنگ خوانہ و نن ہڑتوم آ ملک آتا نیام اٹ تعلقداری تے پین سوگو کننگ نا خواہندار اُن و واپار تون اوار ہر بشخ اٹی کمکاری ءِ پین سوگو کننگ خوانہ انتئے کہ پاکستان بوسنیا تون تعلقداری تے بھاز اہمیت ایتک۔ اوپارے کہ ہڑتوم آ ملک آک واپار تون اوار چندی بشخ آتیٹی کمکاری ٹی ودکی نا فیصلہ ءِ کرینو۔ وزیراعظم پارے کہ بوسنیا، ہرزیگووینا نا پریذیڈنسی نا چیئرمین شفیق جعفر ووچ و بوسنیا نا حکومت نا کشمیر آ پاکستان نا موقف نا مخ تفی آ منت وار اُن۔ اوپارے کہ جہانی کہول آ بین المذاہب ہم آہنگی نا گرج ءِ، آجوئی سلاہ درشانی ءِ ہرمذہب ءِ منوک آتا جوزہ غاتے مجروح کننگ کن کاریم اٹ اتنگپ۔ نن فرانس اٹی گستاخانہ مواد نا باندات آ ہم ہیت کرینن۔ آجوئی سلاہ درشانی نا آڑ اٹ مسلمان تا بے شرفی مف، رسول کریم صلی اللہ علیہ و آلہ وسلم نا شان اٹی گستاخی ءِ اسہ مسلمان اس ہم سگنگ کپک۔ رسول پاک صلی اللہ علیہ و آلہ وسلم نا ذات انا حرمت مسلمان تیکن بھاز اہم ءُ باندات اسے۔ داہیت ءِ یورپی و دیکی ملک آک پہہ مریر۔ اوپارے کہ گستاخانہ مواد آتا تشہیر نا مذمت ءِ کینہ۔ اوپارے کہ بوسنیا، ہرزیگووینا نا پریذیڈنسی نا چیئرمین شفیق جعفر ووچ انا کنڈآن دورہ بوسنیا نا سلہ خلنگ آ اونا منت وار اُٹ۔ داوخت آ گپ وتران کرسا بوسنیا، ہرزیگووینا نا پریذیڈنسی نا چیئرمین شفیق جعفر ووچ پارے کہ وزیراعظم عمران خان نا سلہ غا پاکستان نا دورہ غا بھاز خوشی مسنے۔ پاکستان و بوسنیا سنگت ملک ءُ، ہڑتوم آ ملک آتا نیام اٹ تعلقداری تے مون آ دننگ نا بھلو گنجائش اس ارے۔ اوپارے کہ جنگ اٹی و جنگ آن پد بوسنیا ہرزیگووینا نا امداد آ پاکستان نا منت وار اُن۔ اوپارے کہ زمی جمب آن پد پاکستان اٹی اسکول آتا جوڑ کننگ و ایلو ڈٹ آتا بابت انتس کہ کننگ کرینہ نن کرین۔ ہڑتوم آ ملک آک مشکل ساہت اٹی اسہ ایلو تون تفینو، اینو نن سائنس و ٹیکنالوجی نا بشخ و شاری تے آسراتی تا فراوانی نا بابت مفاہمتی یات داشت آتیا دستخط کرینن۔ ہڑتوم آ ملک آتا نیام اٹ واپاری کچ اٹی ودکی نا بھلو وارخواہی اس ساڑی ءِ۔ ہڑتوم آ ملک آتا نیام اٹ 4.5 ملین یورو نا واپار ءِ پین ودفنگ کن گام گیج آتا گرج ءِ۔ اوپارے کہ اقوام متحدہ امن مشن نا رداٹ پاکستانی دستہ غاک بوسنیا ٹی اہم کڑد ادا کریر۔ اوپارے کہ کشمیر نا ویل اناپرامن ایسری انسانی حق کنونشن نا رداٹ ایسر اس پٹنگے۔ اوپارے کہ کشمیر اٹی انسانی حق انا خلاف ورزی اہم ویل ءِ، کشمیری تا است خواہی تا رداٹ ویل انا ایسری المی ءِ۔ دہشت گردی جہانی ءُ ویل اسے ہراڑتون مون تننگ کن اسیجائی کوشست آتا گرج ءِ۔ نن فرانس و آسٹریا ٹی دہشت گردی نا جلہو آتا مذمت ءِ کینہ۔ دا باندات آ پیدوار موقف ءِ کہ برائی آن ہچ ءُ جوانی اس پیش تمنگ کپک نن مچ آ دنیا ٹی اسلاموفوبیا نا مذمت ءِ کینہ۔ مچ آ دنیا ٹی مسلمان تا مذہبی جوزہ غاتے مجروح کننگ ءِ امنا کننگ مفک۔ اوپارے کہ ایلوتا مذہبی جوزہ غاتا ہم خیال ءِ کننگے۔ آجوئی سلاہ درشانی نا حدود و قیود اس مرے۔ اوپارے کہ بوسنیا نا راج متنوع و متحد ءِ۔ پاکستان کورونا دین انا سرسہبی اٹ مقابلہ ءِ کرینے۔ وزیر اعظم عمران خان کورونا دین انا توننگ کن کمک نا سلہ خلکونے ہراڑآاونا منت وار اُن۔ وزیراعظم عمران خان ءِ بوسنیا نا دورہ نا سلہ خلکونن، اومیت ءِ زوت او ننا ملک انا دورہ ءِ کیک۔ داکان مست ہڑتوم آ ملک آتا نیام اٹ سائنس و ٹیکنالوجی و ہڑتوم آ ملک آتا شاری تے آسراتی تا فراوانی نا یات داشت آتیا دستخط کننگا۔
