اقوام متحدہ۔ 03 نومبر (اے پی پی) اقوام متحدہ نا سیکرٹری جنرل انتونیوگوتریس صحافی تا برخلاف ڈوہ تا توننگ نا جہانی دے انا وخت آ صحافی تے رکھ فراوان کننگ نا خواست کرے۔ داوخت آ انتونیوگوتریس تینا کلہو اٹی پارے کہ ہراتم صحافی تے شست کننگک تو راج ءِ دانا قیمت ءِ ادا کروئی تمک۔ اگہ نن صحافی تا رکھ ءِ کپنہ تو معلومداری ہلنگ و شاہدی تیا مبنی فیصلہ کننگ نا ننا لائخی ٹی بھاز زیات اڑاند ودی مریک۔ اوپارے کہ کورونا نا دین صحافی و میڈیا نا بندغ آتیکن پوسکن ءُ فریشانی اس ودی کرینے انتئے کہ اوفتا جونی سلامتی آ جلہو آتا کچ اٹی ودکی مسنے۔ اوپارے کہ اینخو سال انا اولیکو 6 تُو اٹی صحافی تیا جلہو آتا کم از کم 21 واقعہ مسنے ہرا 2017ء ٹی صحافی تیا کل جلہو آتا مترادف ءِ۔ اوپارے کہ صحافی تا کاریم اٹی ودکی اڑاند ارے ہراٹی استغاثہ نا دھڑکو، دزگیری، بندی، صحافتی رسینگ آن نمن، صحافی تا برخلاف ڈوہ تا جاست وپاست و اوفتا برخلاف کانودی چارہ جوئی اوار ءِ۔
