اقوام متحدہ۔ 28 اکتوبر (اے پی پی) اقوام متحدہ نا پاننگ ءِ کہ اینخو سال انا بنائی 9 تُو اٹی اوغانستان اٹی زوال و ٹھپی مروک آ لس شاری تا کچ اٹی تدوک آ سال انا بنائی 9 تُو تا مقابلہ ٹی 30 درسد کمتی مسنے۔ اقوام متحدہ نا اوغانستان کن کمکار مشن جاری کروک آ رپورٹ اٹی بیدادی نا ودوک آ واقعہ غاتیا گڑتی نا درشانی ءِ کرینے۔ رپورٹ اٹی اوغانستان نا غٹ کڑدہ غاتیا اسہ وار ولدا زور شاغنگاکہ لس شاری تا رکھ اکن پین گام گیج کننگے و کڑدہ غاک جنگ انا چٹفنگ کن ہم کاریم کیر، اقوام متحدہ نا سیکرٹری جنرل نا اوغانستان کن نمائندہ خصوصی ڈیبورہ لیونز نا پاننگ ئس کہ مذاکرات نا کمک اٹ امن اٹی ہم داسکان وخت لگک۔ ولے کڑدہ غاتے ہیت وگپ ءِ اولیت ترسا لس شاری تے رسینگوک آ بھلا نسخان تے کم کننگ کن دمدستی ودکی گام گیج کروئی مریک۔ رپورٹ نا رداٹ 2020ء نا بنائی نہہ تُو یکم جنوری آن 30 ستمبر اٹی اوغانستان اٹی بیدادی نا چندی واقعہ غاتیٹی 2117 اوغان شاری زوال وخت اس کہ 3822 ٹھپی مسر۔ رپورٹ نا رداٹ 2012ء آن پد آن اینخو سال انا بنائی نہہ تُو اٹی دا بیدادی نا واقعہ غاتیٹی زوال و ٹھپی مروک آ لس شاری تا کچ غٹ آن کم ءِ۔ اقوام متحدہ نا رپورٹ اٹی پاننگانے کہ 12 ستمبر آ قطر انا دارالحکومت دوحہ ٹی اوغان حکومت و طالبان تا ڈل آتا نیام اٹ بین الاوغان مذاکرات نا بناآن ہلیس 30 ستمبر اسکان متحارب کڑدہ غاتا سوب آن زوال یا ٹھپی مروک آ لس شاری تا کچ اٹی ہچ ءُ کمتی اس بتنے۔ اقوام متحدہ نا رداٹ ہندا تُو اوغانستان نا سویلی صوبہ ہلمند اٹی مروک آ جنگ اتون اوار کیہی ایلو علاقہ غاتیٹی جلہو گیر فورس آتا چاگڑدی کارروائیک گڑتی نا سوب ءُ۔ ہرافتے ٹی 400 لس اوغان شاری زوال یا ٹھپی مسر۔ رپورٹ اٹی پاننگانے کہ اینخو سال بنائی نہہ تُو اٹی زوال و ٹھپی مروک آتیٹی 31 درسد چنا وخت اس کہ 13 درسد زالبول اوار ءُ۔ اقوام متحدہ نا رپورٹ اٹی حکومت مخالف آتے شاری تا گیشتری نا زوال یا ٹھپی مننگ نا زموار گوندنگانے۔ طالبان نا سوب آن زوال یا ٹھپی مروک آتا کچ اٹی دا وخت اٹی شش گنا ودکی ریکارڈ کننگانے۔ رپورٹ نا رداٹ 23 درسد شاری تا زوال یا ٹھپی مننگ نا زموار اوغان سیکورٹی فورس آک ءُ۔ اقوام متحدہ نا رپورٹ آ اوغان حکومت نا ہچ ءُ ردعمل اس مون آ بتنے۔ ایلو کنڈآ طالبان ترجمان اقوام متحدہ نا رپورٹ آ ردعمل نا درشانی ءِ کرسا پارے کہ دا رپورٹ ءِ اونا حریف نا تروک آ معلومداری تا بنداو آ مرتب کننگانے۔
