اسلام آباد۔ 26 اکتوبر (اے پی پی) وزیراعظم عمران خان پارینے کہ پاکستان امریکہ، طالبان و اوغان حکومت نا نیام اٹ گپ وتران اٹی اہم کڑد ادا کرے، ڈیہہ نا آخبت امن، کمکاری و واپار تون گنڈوک ءِ، پاکستان نا حکومت، فوج و انٹیلی جنس ادارہ غاک اوغانستان اٹی بیدادی نا چٹفنگ و امن کن کوشست کننگ ءُ۔ بھارت تون سنگتی نا بھاز کوشست کرین ولے بھارت نظریاتی وڑاٹ ننا برخلاف ءِ ہنداخاطرآن ننا کوشست آک بھرمی مننگ کتوس، اوغان الس ہراحکومت ءِ گچین کے پاکستان اوڑتون تعلقداری تے سوگو کیک، ننے مستین آن سبخ ہلسا آخبت نا کنڈآ ہنوئی مریک۔ داخیال آتا درشانی ءِ او دوشنبےنادے آ اِرادے ئی پاکستان۔اوغانستان واپار و زرکاری فورم 2020نا بنائی سیشن آن تران کرسا کرے۔ داوخت آ اسپیکر قومی اسمبلی اسد قیصر، بنجائی وزیر حوالکاری و شینکاری سینیٹر شبلی فراز، وزیر خارجہ شاہ محمود قریشی، بنجائی وزیر دفاع پرویز خٹک، ڈپٹی اسپیکر قومی اسمبلی قاسم خان سوری، وزیراعظم نا سلاہکار واپار عبدالرزاق داؤد، گورنر خیبرپختونخواشاہ فرمان، وزیراعلیٰ خیبرپختونخوامحمود خان تون اوار بڑزکو کمامدارآک ساڑی ئسر۔ وزیراعظم عمران خان پارے کہ واپاری و السی رابطہ غاتا مون آ دننگ کن فورم نا اڈتننگ بھاز اہمیت تخک، دافورم اٹ بشخ ہلوک آ اوغان مہمان تے بخیر اٹی پاوہ و دانا اڈتننگ آ اسپیکر قومی اسمبلی ءِ مبارکباد پیش کیوہ۔ اوپارے کہ پاکستان و اوغانستان نا نیام اٹ تعلقداری تا اسہ بھلو تاریخ اسے۔ دا ڈیہہ نا اوغانستان تون پیڑی تیان تعلقداری ءِ۔ اوغانستان مغلیہ سلطنت نا بشخ ئس۔ ساڑی پنجاب و خیبرپختونخوا نا علاقہ غاک اوغانستان نا درانی سلطنت نا ہم بشخ ئسر۔ قبائلی علاقہ و اوغانستان تون پیڑی تیان کلکتہ اسکان واپاری قافلہ ہناکہ۔ وزیراعظم پارے کہ اوغان جہاد بنامننگ اسکان نیامی ایشیا و اوغانستان آن ہندوستان تون واپاری مرسا کریکہ۔ دا ننا تاریخ ءِ۔ دہلی سلطنت اٹ درباری زبان فارسی ئس۔ اوغان کمامدارآک ہم پشتو تون فارسی پاریرہ۔ اوپارے کہ بدبختی اٹ اوغانستان 40 سال آن بے چیٹی نا گواچی ءِ ہراڑآن نئے بیرہ اوغانستان بلکن پاکستان نا ہم بھاز نسخان مس۔ وزیراعظم پارے کہ تدوک آ 18 سال آن دہشت گردی نا پن آ جنگ آن اوغانستان آن بیدس پاکستان ءِ ہم بھاز نسخان مس و اختلاف و شک و شبہ ہم ودی مس ولے نن مستین اٹ بایدے اختہ مفن بلکن آخبت نا کنڈآہُرن۔ ننے مستین آن سبخ ہلسا مون آ ہنوئی مریک۔ پاکستان مستین آن ہیل کرینے۔ اوغانستان نا تاریخ گواہ ءِ کہ پیشن آن اسٹ اس ہم اوغانستان آ اثرانداز مننگ کپک۔ اوغان تینا فیصلہ غاتے تینٹ کیرہ و پیشن نا اثر ءِ ہلپسہ۔ اوغان الس امرو حکومت اس چار گچین کی، دا اوفتا تینا فیصلہ ءِ۔ ہرااوغان حکومت مریک پاکستان اوڑتون تینا تعلقداری تے سوگو تخک۔ وزیراعظم پارے کہ بھارت تون پاکستان نا مسہ جنگ مسنے۔ 72 سال اٹی بھارت نا تہہ ٹی مسلمان تیان خار کروک ءُ دُن ءُ ہچ ءُ حکومت اس بتنے۔ آر ایس ایس نا تاریخ پاہک کہ او مسلمان تا نسل ءِ چٹفنگ خواہک۔ نن بھارت تون سنگتی نا بھاز کوشست کرین ولے بھارت نظریاتی وڑاٹ پاکستان نا برخلاف ءِ۔ ہنداخاطرآن ننا کوشست آک بھرمی مننگ کتوس۔ اوپارے کہ بھارت اٹی مسلمان تتون مروک آ ناروا سلوک نا درور ملیپک۔ بھارت مچ آ مقبوضہ کشمیر ءِ زندان خانہ ٹی بدل کریے و 80 لکھ مخلوق نازند ءِ ژند کرینے۔ وزیراعظم پارے کہ امن و سوگوی کن پاکستان و اوغانستان اٹی سوگو تعلقداری المی ءِ۔ نن اوغانستان تون تعلقداری تے جوان کینہ و ہروڑاٹ اوغانستان تون کمک کینہ انتئے کہ دا ڈیہہ نا آخبت امن، کمک و واپار تون گنڈوک ءِ۔ اوپارے کہ اوغانستان اٹ بے چیٹی آن پاکستان نا قبائلی علاقہ غاک ہم بھاز زہمی مسنو و پاکستان نا قبائلی علاقہ غاتیٹی ہم واپار آن شونہالی بننگ کیک۔ ننا حکومت دولت اٹ ودکی کن پبی گام گیج کننگ ءِ۔ داڑکن واپار و صںعت ءِ مون آ دننگ و بزنس کمیونٹی ءِ ہرفوئی مریک۔ اوپارے کہ پاکستان نا اولیت واپار نا مون آ دننگ ءِ۔ اوغانستان ننا قدرتی شریدار ءِ۔ اوغانستان تون واپار تون اوار ہروڑنا تعلقداری ءِ مون آ دننگ خوانہ۔ اوغانستان اٹی امن آن خاص وڑاٹ خیبرپختونخوا و پاکستان نا فائدہ ءِ۔ وزیراعظم پارے کہ اوغانستان اٹی امن کن پین اسہ ملک اس ہم داخہ کوشست کپننگ ءِ اخس کہ پاکستان کننگ ءِ انتئے کہ ننا آخبت اوغانستان و نیامی ایشیاتون واپاری مون آ دننگ تون گنڈوک ءِ۔ وزیراعظم پارے کہ پاکستان امریکہ و طالبان و حکومت نا نیام اٹ گپ تران اٹی اہم کڑد ادا کرے۔ اوغانستان اٹی ہڑدے مروک آ شہیدی تیا ننے تکلیف ءِ و ننا حکومت، فوج و انٹیلی جنس ادارہ غاک اوغانستان اٹی بیدادی نا چٹفنگ و امن کن کوشست کننگ ءُ۔ وزیراعظم پارے کہ او اوغانستان اٹی کاروباری تپہ ءِ پاکستان اٹ بخیر اٹ پاہک۔
