کابل۔ 07 مارچ (اے پی پی) دے ٹکی اوغانستان نا صوبہ ننگرہار نا چندی علاقہ غاتیٹی سیکورٹی فورس آتا کارروائی تیٹی شدت پسند تنظیم داعش نا 37 کارندہ تپاخت کریر، قندہار اٹی طالبان و سیکورٹی فورس آتا نیام اٹ جھیڑہ غاتیٹی 15طالبان و 6پولیس کارندہ تپاخت کریر، قندوز اٹی اسہ دھماکہ اسے ٹی 15طالبان تپاخت کریر۔ اوغان میڈیا نا رداٹ کمامدارآک پاریر کہ ننگرہار نا چندی علاقہ غاتیٹی سیکورٹی فورس آتا کارروائی تیٹی شدت پسند تنظیم داعش نا 37 کارندہ تپاخت کریر ہرافتے ٹی مسہ خودکش جلہو گیر ہم اوارئُ۔ گورنر ننگرہار نا ترجمان عطاءاللہ خوگیانی پارے کہ کارروائیک کوٹ و آچین نا علاقہ غاتیٹی کننگار ولے او دابابت مستی سرجم احوال تتو۔ سویلی صوبہ قندہار اٹی طالبان و سیکورٹی فورس آتا نیام اٹ جھیڑہ غاتیٹی 15طالبان و 6پولیس کارندہ تپاخت کریر۔ پولیس نا رداٹ دا جھیڑہ غاک ضلع نیش نا علاقہ ٹی مسر۔ قطبی صوبہ قندوز اٹی اسہ دھماکہ اسے ٹی 15 طالبان تپاخت کریر۔ وزارت داخلہ نا کنڈآن جاری بیان نا رداٹ دا بندغ آک ضلع امام صاحب اٹی ہمووخت تپاخت کریرہراتم اوفتا گاڈی ٹی دھماکہ مس۔ کمامدارآتا رداٹ تپاخت کروک آتیٹی طالبان نا خود کش اسکواڈ نا کارندہ غاک اوار ئسر۔ دارالحکومت کابل اٹی اسہ دھماکہ اسے ٹی اسہ بندغ اس تپاخت کرے، دھماکہ سکستھ پولیس ضلع ٹی مس و کمامدارآک اسہ بندغ اسے نا تپاخت کننگ ئِ پک کرینو۔
