اسلام آباد۔ 06 اکتوبر (اے پی پی) سپریم کورٹ بلوچستان اسمبلی نا حلقہ پی بی 8 اٹ دُوارہ گچین کاری کرفنگ نا بابت بلوچستان ہائی کورٹ نا فیصلہ ءِ کالعدم گوندانے۔ سے شنبے نادے آ جسٹس مشیر عالم نا کماشی ٹی مسہ باسکی بینچ کیس انا سماعت ءِ کرے۔ سماعت اٹی بلوچستان نیشنل پارٹی نا نور عبدالکریم نا وکیل کامران مرتضیٰ موقف تینا کرے کہ گنتی ٹی 312 وونٹ ہندن ءُ ئسر ہرافتیا ہور انا نشان الوکہ، بیرہ 65 وونٹ انا پرخ آن مخالف اومیتدار عبدالرحمان کھیتران کٹا، گچین کاری رولز انا رداٹ بیلٹ پیپر آ ہور انا نشان و دستخط المی ءِ۔ نن دانا برخلاف وخت آ درخواست تسوسن، نن دُوارہ گنی کن ہم تیار اُن، دا باندات درخواست نا قابل سماعت مننگ نا ءِ۔ عدالت عظمیٰ آخیریکو اومیت ءِ۔ سماعت اٹی جسٹس منیب اختر ریمارکس تس کہ داسہ تو دُوارہ گچین کاری مننگ کپک۔ عدالت عظمیٰ بلوچستان اسمبلی نا حلقہ پی بی 8 اٹ دُوارہ گچین کاری کرفنگ نا بابت بلوچستان ہائی کورٹ نا فیصلہ ءِ کالعدم گوندانے۔ یات سلے کہ 2018ء نا لس گچین کاری تیٹی بلوچستان اسمبلی نا صوبائی وزیر خور سردار عبدالرحمان کھیتران حلقہ پی بی 8 آن 65 وونٹ آتا لیڈاٹ سرسہب مسوسس۔ بلوچستان نیشنل پارٹی نا اومیتدار نور عبدالکریم سردار عبدالرحمان نا حلقہ پی بی 8 آن سرسہبی ءِ چیلنج کریسس۔ بلوچستان گچین کاری ٹربیونل حلقہ ٹی دُوارہ پولنگ کرفنگ نا پرمان کریسس، بلوچستان ہائی کورٹ ہم الیکشن کمیشن نا فیصلہ ءِ برقرار تخاسس۔
