اسلام آباد۔ 06مارچ (اے پی پی) مسلم لیگ (ن) نا راہشون مائزہ حمید پارینے کہ پاکستان سپر لیگ نا فائنل نا پرامن اڈتننگ دہشت گردی نا برخلاف کٹنگ ئِ۔ ریڈیو پاکستان تون ہیت وگپ کرسا اوپارے کہ لاہور پاکستان اٹی پی ایس ایل نا فائنل میچ انا پرامن اڈتننگ نا کریڈٹ وزیراعظم محمد نواز شریف و وزیراعلیٰ پنجاب شہباز شریف ئِ کائک۔ اوپارے کہ داکان مست بھاز انگا جاچکار آک لاہور اٹی فائنل نا اڈتننگ آ گڑتی نا درشانی ئِ کریسر ولے حکومت نا سخت کوشست آتیان دا ممکن مس و مچ آ قوم دا چرجوئی ٹی حکومت نا کوشست آتا ستاکننگک۔ مائزہ حمید پارے کہ وزیراعظم محمد نواز شریف و وزیراعلیٰ شہباز شریف تون اوار ہراسیاسی راہشونک اسٹیڈیم اٹی میچ ئِ ہرار اوفک تینا ٹکٹ آتے تینٹ ہلکر۔ مسلم لیگ (ن) نا راہشون پارے کہ پاکستان سپر لیگ نا فائنل میچ آن پد ننے اومیت ئِ کہ پاکستان کن جہانی گوازی تے پدی ملک اٹی اتنگ نا کسر آک ہموار مریرہ۔ اوپارے کہ پاکستان سپر لیگ نا فائنل آن دہشت گرد آتے دا صفا کلہو رسینگانے کہ پاکستانی زند ہ قوم اسے و اوفتا لغور انگا سرجزآتیان خوفزدہ مفروک اُس اف ۔