سرینگر۔ 15 ستمبر (اے پی پی) اقوام متحدہ نا انسانی حق کونسل نا ہائی کمشنر مشیل بیچلیٹ غیر کانودی وڑاٹ بھارت نا کوزہ ٹی جموں و کشمیر نا حالیت آتیا گڑتی ظاہہر کرسا پارینے کہ بھارتی حکومت نا تدوک آ سال 5 اگست نا اسہ کنڈی گام گیج و اوکان پد پوسکن آ ڈومیسائل کانود آن مچ آ مقبوضہ علاقہ نا الس اٹ بھاز بے چینی ودی مننگ ءِ۔ کشمیر میڈیا سروس نا رداٹ جنیوا ٹی اقوام متحدہ نا انسانی حق کونسل نا 45 می دیوان نا بناء آ اقوام متحدہ نا انسانی حق انا ہائی کمشنر تینا بیان اٹی پارے کہ بھارت نا غیر کانودی کوزہ ٹی جموں و کشمیر اٹ پیلٹ گن آتا کاریم اٹ اتنگ تون اوار شاری تا برخلاف بھارتی فوج و پولیس نا بیدادی برجاءِ۔ اوتدوک آ سال کشمیرنا بارواٹ جاری کروک تینا گڈیکو رپورٹ نا حوالہ ءِ ترسا پارے کہ آئین و ڈومیسائل نا کانود تون اوار بھلا کانودی بدلی تیان کشمیری تیٹی بے چینی ودی مننگءِ۔ و خاص وڑاٹ پوسکن آ میڈیا کانود نا نافذ کننگ آن پد آن سیاسی شرہ و السی شمولیت آ پدریسہ سخت پابندی برجاءِ۔ مشیل پارے کہ کشمیری سیاسی راہشون آتون اوار سد آ بندغ آک جبری وڑاٹ نظر بند ءُ۔ اقوام متحدہ نا انسانی حق انا ہائی کمشنر مقبوضہ علاقہ ٹی دمدستی وڑاٹ انٹرنیٹ سروس نا بحالی نا ہم خواست کرے۔
