اقوام متحدہ۔ 14 ستمبر (اے پی پی) اقوام متحدہ نا جنرل اسمبلی نا 75 می سالانہ دیوان ویڈیو لنک انا کمک اٹ پگہ سے شنبے نادے آ نیویارک اٹی بناکیک ہراٹی اسہ ہم سروک مملکت اس جند انا حیثیت اٹ بشخ ہلپک۔ میڈیا نا رداٹ امریکی حکومت کورونا وائرس نا سوب آن نیویارک آ بروک آ ہر بندغ کن 14 دے انا قرنطینہ ءِ المی گوندانے۔ ہنداسوب ءِ کہ اینخو نا سال جنرل اسمبلی نا 75 می دیوان دالحاظ اٹ تاریخی و یکتا وڑانا مریک کہ داٹی دنیا نا اسہ راہشون اس ہم ذاتی حیثیت اٹ ساڑی مفک بلکن ویڈیو لنک انا کمک اٹ تران کیک۔ دیوان اٹی عمومی شرہ 22 ستمبر آبناکیک ہراٹی عام حالیت آتیٹی 100 آن زیات ریاستی سروک جندی حیثیت اٹ بشخ ہلیرہ و دنیا نا اہم ویل آتیا شرہ کیرہ ولے کورونا وائرس نا سوب آن دا دیوان ویڈیو لنک انا کمک اٹ مریک ہراٹی سروک آتا مست آن ریکارڈ مروک تران تے براہ راست خف توننگک۔ دیوان اٹی پاکستان نا وزیراعظم عمران خان 25 ستمبر آ جنرل اسمبلی نا 193 باسک آتیان ویڈیو لنک آ تران کیک و دا فہرست اٹی اونا ششمیکو نمبر ءِ۔ دیوان نا کماشی ءِ ترک سفارتکار وولکن بوزکر کیک ہرا اینو جنرل اسمبلی نا صدر نا وڑاٹ تینا زمواری تے سنبھالک۔ اقوام متحدہ ٹی پاکستان نا سفیر منیر اکرم پارے کہ وزیراعظم عمران خان جنرل اسمبلی نا دیوان اٹی اسہ وار ولدا کشمیر اٹی بھارتی جارحیت، ظلم و جور انا برخلاف دنیا ءِ معلومدار کیک و کشمیری الس نا جہد آجوئی نا تھریک و اوفتا موقف نا مخ تفیءِ کیک و دیوان اٹی جہانی برادری آ زور شاغک کہ او بھارتی جارحیت و انسانی حق انا خلاف ورزی تے توننگ، کشمیر نا خصوصی حیثیت ءِ چٹفنگ نا اسہ کنڈی بھارتی گام گیج و اقوام متحدہ نا سلامتی کونسل نا قرارداد و کشمیری الس نا است خواہی تا رداٹ کشمیر نا ویل انا ایسری کن گام گیج کے۔ اوپارے کہ عمران خان جنرل اسمبلی دیوان اٹی اسلاموفوبیا تون اوار بھارت اٹ رہینگوک آ مسلمان تا برخلاف سیاسی جماعت بی جے پی و آرایس ایس نا کارروائی و اقوام متحدہ نا اصلاحات و جتدید (Revival) و ناروا مالی بہاؤ آ ہم ہیت کیک۔ دیوان اٹی پاکستانی سفیر منیر اکرم جندی حیثیت اٹ ساڑی مریک ہرا وزیراعظم عمران خان و وزیر خارجہ شاہ محمود نا ویڈیو تران تے نشان ایتک وخت اس کہ دیوان اٹی کورونا وائرس نا سوب آن راجی فاصلہ غاتا پابندی آ عملدرآمد کرسا ہر باسک ریاست تینا اسہ سفارتکار اسے ہال آ گدریفک۔
