اسلام آباد۔ 03مارچ (اے پی پی) پاکستان صفا کرینے کہ ملک اٹی ہلوک انگا بھارتی جاسوس کلبھوشن یادیو ئِ بھارت نا حوالہ کننگپک، اونا برخلاف ایف آئی آر تیار کننگانے وخت اس کہ بھارتی حکومت ئِ دابابت اسہ سوالنامہ اس گدریفینن۔ جمعہ نا دے ایوان بالا نا دیوان اٹی وقفہ سوج آتیٹی سرتاج عزیز طلحہ محمود نا سوج انا ورندی ٹی پارے کہ کینیڈا ٹی پاکستانی سفارت خانہ ٹی زیات غاو مشین ریڈ ایبل پاسپورٹ و نادرا کارڈ انا پروسیسنگ اٹی تاخیر نا بابت مریک۔ داغاوتے دمدستی وڑاٹ نادرا ہیڈ کوارٹر آ گدریفنگک۔ سینیٹر سحر کامران نا سوج انا ورندی ٹی وزیراعظم نا سلاہکار خارجہ سرتاج عزیز پارے کہ پاکستان نا داخلی معاملہ غاتیٹی بھارتی نیام تمنگ و دہشت گردی و شرانگیزی نا واقعہ غاتیٹی اوار مننگ نا بابت اقوام متحدہ نا سیکرٹری جنرل ئِ معلومدار کرینن۔ ننا موقف ئِ پذیرائی ملنگ ئِ۔ کلبھوشن یادیو نا برخلاف ایف آئی آر تیار کننگ انگ ئِ۔ بھارت نا حکومت ئِ اسہ سوالنامہ اس تسونن۔ وزیراعظم نا کنڈآن کلبھوشن یادیو نا پن ئِ ہلنگ اٹی ہچ ئُ ویل اس اف۔ اقوام متحدہ نا سیکرٹری جنرل ئِ تروک آ ڈوزیئر اٹی کلبھوشن یادیو نا سرجزآک ہم اوار ئُ۔ نن ایلو ملک و جہانی ادارہ غاتے دانا بابت معلومدار کننگ آ سجفنگ اُن۔ دا معلومداری ڈغاری حق و چندی ادارہ غاتا صلابت آن تیار کننگانے۔ دا معاملہ بے کچ اہمیت و حساس ئِ و داڑکن سرجم اس تیار کروئی مریک۔ کلبھوشن یادیو ئِ بھارت نا حوالہ کپنہ۔
