جنیوا۔ 01 ستمبر (اے پی پی) جہانی ادارہ جان جوڑی ریاست آتے خبڑدار کرینے کہ کاروباری سرجزآتے بحال کننگ و ایلو ادارہ غاتے ملوک آ ملک آک کورونا نا تالانی ءِ توننگ کن رکھی گام گیج آتیا عملدرآمد ءِ برجاتخر انتئے کہ رکھی گام گیج آتیاعمل کپننگ آن بیدس ملک آتے بھاز زوت ملنگ کورونا وائرس نا تباہ کن تالانی نا سوب ءِ۔ جہانی ادارہ جان جوڑی نا ڈائریکٹر جنرل ٹیڈروس ایڈہینوم تدوک آ دے جنیوا ہیڈکوارٹرآن صحافی تے پارے کہ اگہ دنیانا ملک آک کاروباری و ایلو السی ادارہ غاتے بھاز زوملنگ کن سنجیدہ ءُ تو اوفتے کوروناوائرس نا اسہ ایلو ءِ لگنگ نا توننگ و انسانی زندآتے بچفنگ اٹ ہم سنجیدگی نشان تروئی مریک انتئے کہ رکھی گام گیج آتیان بیدس کاروباری سرجز و ایلو ادارہ غاتے ملنگ کوروناوائرس نا تباہ کن تالانی نا سوب ءِ ہندا سوب ءِ کہ کوروناوائرس نا منقلی اخہ در زیات مون ءِ توننگک ہموخہ در اوفتے کن ادارہ غاتے ملنگ نا کسر آک زیات آوار مریرہ ۔ اوپارے کہ حقیقت دادے کہ کورونا وائرس بھاز ترندی و آسانی اٹ تالان مریک و داڑآن ہر وئی نا مخلوق زہمی مننگ کیک و گڑاس مخلوق بھاز زیات زہمی مریرہ ہنداخاطرآن دانا منتقلی ءِ توننگ کن داوڑنا سوب آتے توروئی مریک ہرادانا تالانی نا سوب ءُ دُن کہ نائب کلبز، اسٹیڈیم و مذہبی و السی ہند آتیا زوت مخلوق نا مچی آ پابندی خلنگے و داہیت آ ہم سجفوئی مریک کہ داوخت انا حالیت آتے مون آ تخسا چوخت و ہراوڑ ہلہلہ ئی سوچ ءِ تینا کروئی مریک ۔ اوپارے کہ ہرا ملک آتیٹی کورونا وائرس نا زہمی کیس آتا کچ زیات ءِ اوفتے دانا منتقلی ءِ توننگ کن رکھی گام گیج آتے تینا کننگ نا گرج ءِ و ہرا ملک آک دانا تالانی نا مون ءِ توننگ اٹ سرسہب مسنو ہموڑے منتقلی نا کچ کم ءِ و اوتینا ملک آتے ملانو ولے اوفتے رکھی گام گیج آتے ہم تینا کروئی مریک ہنداخاطرآن دا ہراسٹ نا زمواری ءِ کہ او کروناوائرس نا تالانی و منتقلی ءِ توننگ کن ایلوفتیان اسہ میٹر نا فاصلہ تخر۔
