گوادر پورٹ آن کٹیا ٹی بلوچستان نا بشخ اکن دستوراٹی پوسکن ئُ ترمیم اس اتوئی تمک
اسلام آباد۔ 03مارچ (اے پی پی) بنجائی وزیر جہازرانی و بندرگاہیں میر حاصل بزنجو پارینے کہ گوادر پورٹ آن مروک آکٹیا نا ہچ ئُ بشخ اس بلوچستان ئِ تننگ مفک، داڑکن دستور اٹی پوسکن ئُ ترمیم اس اتوئی تمک۔ جمعہ نا دے ایوان بالا نا دیوان اٹی وقفہ سوج آتیٹی اعظم سواتی نا سوج انا ورندی ٹی میر حاصل بزنجو پارے کہ گدرینگوک آ مسہ سال اٹی بنجائی وزارت نا افسر یا کارندہ اسے دُوارہ ملازمت تننگ تنے۔ وزارت نا ملازم آتا ڈگریک داوخت اسکان چیک کرفنگ تنو۔ سینیٹر چوہدری تنویر نا سوج انا ورندی ٹی میر حاصل بزنجو پارے کہ جولائی 2016ءآن دسمبر 2016ءاسکان کراچی پورٹ ٹرسٹ انا کمک اٹ کروک آ واپار نا کچ اِراکروڑ 58لکھ ٹن ئِ۔ کراچی پورٹ ٹرسٹ اکن دہ سالہ بزنس ڈویلپمنٹ پلان اس تیار کننگ انگ ئِ ہرانا مسخت جہانی معیار یعنی مشینی و پیداواری لائخی نا دوئی ئِ۔ سینیٹر تنویر خان نا سوج انا ورندی ٹی اوپارے کہ بندرگاہ تا اتھارٹیک بندرگاہ تا خڑک سمندر ئِ گہرا کننگ کن بندرگاہ نا تہہ ئِ صاف کننگ ئُ۔ سینیٹر عثمان کاکڑ نا سوج انا ورندی ٹی اوپارے کہ وزارت اٹی ملازمت آتیٹی کوٹہ آ عملدرآمد کننگ تنے۔ داسہ نن دادے المی جوڑ کننگ اُن۔ سینیٹر شبلی فراز نا کنڈآن سوج انا ورندی ٹی میر حاصل بزنجو پارے کہ گوادر پورٹ اناکٹیا ئِ حکومت بلوچستان تون شریک کننگ کن ہچ ئُ پالیسی و وڑوڈول اس اف۔ دا بنجائی مضمون اسے۔ داٹی صوبہ غاتا بشخ اف۔ داڑکن پوسکن ئُ ترمیم اس المی ئِ۔ اوپارے کہ سینیٹ نا کنڈآن بٹنگ انگ آ گوادر معاہدہ ایوان اٹی کپنہ۔ سینیٹر احمد حسن نا سوج انا ورندی ٹی شیخ آفتاب احمد پارے کہ قومی شاہراہ این 45نوشہرہ آن چترال اسکان کائک۔ داسہ دا شاہراہ نیشنل ہائی وے ئِ تننگانے ۔ دادے گچین جوڑ کننگ انگ ئِ۔ سی پیک اٹی اوار کننگ آ فزیبلٹی جوڑ مننگ ئِ۔
