اسلام آباد۔ 03مارچ (اے پی پی) بنجائی وزیر ڈٹ بندی ، شونداری و اصلاحات پروفیسر احسن اقبال پارینے کہ پاکستان ڈیہہ ٹی امن، شونداری و شونہالی کن اہم کڑد ادا کننگ نا لائخی تخک۔ چین پاکستان اقتصادی راہداری و گوادر بندرگاہ نا سوب پاکستان نیامی و سویلی ایشیائی و دیکی ملک آتیٹی واپار و رابطہ غاتے کن اہم ملک اس جوڑ مریک۔ داخیال آتا درشانی ئِ او جمعہ نا دے پلاننگ کمیشن اٹی چین پاکستان اقتصادی راہداری نا بابت آن جاچ دیوان آن تران کرسا کرے۔ دیوان اٹی چینی سفارت خانہ و تعلقدار وزارت آتا بڑزکو کمامدارآک ساڑی ئسر۔ دیوان اٹی توانائی ، شاہرات، ریلوے، ماس ٹرانزٹ ڈٹ، خصوصی اقتصادی زون و گوادر نا زیر تکمیل ڈٹ آتا جاچ ئِ ہلنگا۔ دیوان اٹی اقتصادی راہداری نا مریس وختی ڈٹ انا جاچ ئِ ہم ایجنڈا ٹی اوار کننگانے۔ جاچ دیوان ئِ وزارت دیر و بجلی نا کنڈآن توانائی نا زیر تکمیل ڈٹ آتیا بریفنگ تننگا۔ داوخت آ بنجائی وزیر ڈٹ بندی ، شونداری و اصلاحات پروفیسر احسن اقبال پارت کرے کہ غٹ ڈٹ آتا بروخت پوروی ئِ المی جوڑ کننگے۔ اوپارے کہ توانائی ڈٹ آتے چاگڑد دوست جوڑ کننگ کن جدید ٹیکنالوجی نا کاریم اٹ اتنگ و جہانی قواعد ئِ مون آ تخنگے۔ معیار آ ہچ ئُ سمجھوتہ اس کننگپک ۔ اوپارے کہ بجلی ٹرانسمیشن لین و ڈسٹری بیوشن نا ڈٹ آک پیداواری ڈٹ آتا متوازی ئِ پورو کننگ حکومت نا اولیت ئِ۔ داٹی ذرس ہم ڈیوالائی ئِ سگنگ پننگک۔ اوپارے کہ سی پیک ڈٹ آتا سیکورٹی ئِ المی جوڑ کننگ کن غٹ صوبائی حکومت آک بنجائی وزارت داخلہ تون کمکاری ئِ المی جوڑ کیر۔ اوپارے کہ کانود نافذ کروک آ ادارہ غاک تین پہ تینی رابطہ غاتے استوار کننگ کن ایس او پی اس وضع کیر۔ اوپارے کہ ڈٹ آتا بروخت پوروی کن فنڈ انا فراوانی ئِ المی جوڑ کننگے۔ بنجائی وزیر نیشنل ہائی وے اتھارٹی نا کمامدارآتے دیکی روٹ و ملتان سکھر موٹروے نا ڈٹ آتا بابت خصوصی پارت کرے کہ روڈ آتا پوروی ٹی ڈغار تا دوئی و معاوضہ طے کننگ کن ضلعی انتظامیہ و گچین مروک آ نمائندہ غاتیان کمک ہلنگے۔ اوپارے کہ شش می جوائنٹ کوآپریشن کمیٹی (جے سی سی ) ٹی ہراشاہراہ تے سی پیک نا بشخ جوڑ کننگانے، اوفتیا کاریم نا بروخت بنائِ المی جوڑ کننگے۔ اوپارے کہ انفراسٹرکچر گروپ شاہرات نا پوسکن آ ڈٹ آتیا صوبائی کمامدار آتون اواری اٹ کاریم کننگ کن اسیجائی کمیٹی اس جوڑ کے۔
