واپڈا کچھی کینال فیز۔ ون نا ایلو کاریم تا تفنگ نا مرحلہ نا بناءِ کرے
اسلام آباد۔ 26 اگست (اے پی پی) کچھی کینال بلوچستان اٹ آب پاش کشت وکشار نا شونداری و نیزگاری نا چٹفنگ نا سوب آن صوبہ نا مر مر انگا پسماندہ علاقہ غاتا شدت پسندی نا تدارک کن بھاز اہم ءِ۔ ڈٹ انا اہمیت نا رداٹ واپڈا کچھی کینال فیز۔ون نا ایلو کاریم تا جوڑ کننگ نا مرحلہ نا بناءِ کرینے۔ فیز۔ون نا ایلو کاریم تا رداٹ 3 سال انا مد اٹی 40 کلومیٹر مریس پکا مین کینال و 32 کلومیٹر مریس ذیلی ڈورتا تالان آبپاشی نا نظام ءِ تفنگک اوکان پد ڈیرہ بگٹی ضلع ٹی پین 30 ہزار ایکڑ بنجر ڈغار سیراب مننگ کیک۔ داخیال آتا درشانی ءِ چیئرمین واپڈا لیفٹیننٹ جنرل مزمل حسین(ریٹائرڈ) اینو کچھی کینال نا دورہ نا وخت آ کرے۔ جنرل منیجر(سینٹرل) واٹر عطاء اللہ میمن و پروجیکٹ ڈائریکٹر سید اختر علی شاہ ئسک ہم داٹی ساڑی ئسر۔ داہیت ذکر انا قابل ءِ کہ واپڈا مسہ سال مست کچھی کینال فیز۔ون نا رداٹ 363 کلومیٹر مریس مین کینال و داڑتون متصل آبپاشی نا نظام اگست 2017ء ٹی پورو کرینے۔ ہرانا کمک اٹ 72 ہزار ایکڑ ڈغار سیراب کننگ مریک۔ تینا دورہ ٹی چیئرمین واپڈا پارے کہ دافتے کن داہیت خوشی نا سوب ءِ کہ سوئی و ڈیرہ بگٹی ٹی واقع کچھی کینال نا کمانڈ ایریاٹی 52 ہزار ایکڑ ڈغار آ کشارگری نا بناءِ کننگانے۔ ہرا سوئی و ڈیرہ بگٹی نا پسماندہ علاقہ غاتیٹی مخلوق نا زند اٹ مثبت بدلی نا پیش خیمہ ءِ۔ اواومیت ظاہر کرے کہ بلوچستان نا حکومت ایلو 20 ہزار ایکڑ ڈغار ءِ ہم بھاز زوت آوار کیک اوکان پد داڈغار آہم فصل دسنگک۔ چیئرمین واپڈا مستی پارے کہ واپڈا کچھی کینال نا ارٹ میکو و مسٹ میکو مرحلہ نا فزیبلٹی رپورٹ تیار کننگ نا عمل ناہم بناءِ کرینے۔ داکان مست جنرل منیجر (سینٹرل) واٹر عطاء اللہ میمن چیئرمین واپڈا ءِ ڈٹ انا اولیکو مرحلہ نا ایلو کاریم تا تفنگ وخت اس کہ ارٹ میکو و مسٹ میکو مرحلہ نا فزیبلٹی رپورٹ آتا تیاری نا بارواٹ پیش رفت آن معلومدار کرے۔ کچھی کینال ڈٹ بلوچستان اٹ کشت وکشار، کشاری بشخ انا بابت صنعت نا مون آدننگ تون اوار اوار صوبہ نا اقتصادی و راجی شونداری کن بے کچ اہم ءِ۔ کچھی کینال پنجاب نا ضلع مظفرگڑھ اٹ واقع تونسہ بیراج آن پیش تمک و دانا کمانڈ ایریا صوبہ بلوچستان نا ضلع ڈیرہ بگٹی، نصیر آباد، بولان و جھل مگسی ٹی واقع ءِ۔ دا ڈٹ ءِ جوڑ کننگ مسہ جتا مرحلہ غاتیٹی پورو مریک۔
