کمیٹی سیل و سوات نا مون آ دننگ اٹ بروک آ اڑاند آتے مُر کننگ کن پبی سلاہ و سوج مرتب کننگ و پارت جاری کننگ نا مجاز مریک، دیوانءِ ہر پانزدہ دے آن پد باقاعدگی اٹ اڈ تننگک
اسلام آباد۔ 26 اگست (اے پی پی) وزیراعظم عمران خان پاکستان نا طول و ارض اٹ تالان است چکوک سیل و سواتی ہند و ملکی سیل و سواتی کچ ءِ پورو وڑاٹ کاریم اٹ اتنگ نا بابت بھلو فیصلہ اس کرسا سیل و سوات نا بابت حکومتی اولیت آتے عملی دروشم اس تننگ کن بڑزکو کہولی نیشنل کورآرڈینیشن کمیٹی سیل و سوات اس ٹہفینے۔ وزیراعظم آفس نا میڈیا ونگ آن جاری بیان نا رداٹ بڑزکو کہولی نیشنل کوآرڈینیشن کمیٹی سیل و سوات خصوصی کمکار بیرون ملک پاکستانیز اینڈ ہیومن ریسورس ڈویلپمنٹ (بطور کنوینر)، وزارت صنعت و پیداوار، وزارت داخلہ، وزارت دفاع، وزارت مواصلات، وزارت ہوابازی، وزارت مذہبی امور و وزارت ماحولیاتی بدلی نا سیکرٹری صاحب آک یا اوفتا نمائندہ غاک (ہرا گریڈ 21 آن کم مفس)، غٹ چیف سیکرٹری یا ایڈیشنل چیف سیکرٹری، چیئرمین متروکہ املاک بورڈ، ڈپٹی گورنر اسٹیٹ بینک، منیجنگ ڈائریکٹر پاکستان ٹورازم ڈویلپمنٹ کارپوریشن آ تالان مریک۔ کنوینر سرکاری یا نجی بشخ آن ہرابندغ ءِ چائے کمیٹی ٹی اوار کننگ نا مجاز مریک۔ بنجائی و صوبائی نمائندہ غاتیان تالان کمیٹی نا زمواری تیٹی نیشنل ٹورازم اسٹریٹجی آ عملدرآمد نا جاچ ءِ ہلنگ و صوبائی و علاقائی کہول آ چندی گام گیج آتے نیشنل اسٹریٹجی و ایکشن پلان تون ہم گرنچ کروئی مریک۔ کمیٹی سیل و سوات نا بابت وزیراعظم نا پارت آتیا عملدرآمد و دا بابت پیش رفت انا جاچ ءِ ہلیک۔ ملکی سیل و سواتی ہند آتا جیومیپنگ، سیل و سواتی آسراتی، پراڈکٹس و سروسز نا جاچ ہم کمیٹی نا دنگ اٹ مریک۔ کمیٹی سیل و سوات ءِ مون آ دننگ اٹ بروک آ اڑاند آتے مُر کننگ کن پبی سلاہ و سوج مرتب کننگ وپارت جاری کننگ نا مجاز مریک تانکہ سیل و سوات ءِ مون آ دننگ کن جوان و سہی چاگڑد اس ودی کننگ مرے۔ کمیٹی پالیسی و کانود جوڑ کننگ نا کہول آ اڑاند مشکل آتا بابت گام گیج آتا سفارش کیک۔ سیل و سوات تون تعلقدار باندات آتیٹی اسہ وڑ آب ءِ پک کننگ نا بابت ریگولیٹری و عملدرآمد نا نظام اس جوڑ کننگ نا زمواری ہم کمیٹی ءِ تننگانے۔ نیشنل کوارڈینیشن کمیٹی سیل و سوات نا بشخ اٹ پبلک پرائیویٹ پارٹنر شپ انا کمک اٹ زرکاری نا مون آ دننگ، چنکا و نیامئی صنعت آتا مون آ دننگ و چندی ڈٹ آتا قابل عمل مننگ نا بابت باندات آتا جاچ ءِ ہلیک۔ نیشنل کوآرڈینیشن کمیٹی سیل و سوات نا بابت پوسکن آ گام گیج آتا پیدواری ءِ کیک۔ ہندی سیل و سوات نا مون آ دننگ کن حکمت عملی اس جوڑ کننگ نا زمواری ہم کمیٹی ءِ تننگانے۔ کمیٹی سیل و سوات نا بابت افرادی قوت نا لائخی تے ودفنگ نا بابت گام گیج سلاہ کیک۔ بڑزکو کہولی کمیٹی سیل و سوات نا بابت چندی وزارت، ڈویژن، محکمہ و تعلقدار آتے پارت جاری کننگ نا مجاز مریک۔ کمیٹی نا دیوان ءِ ہر پانزدہ دے آن پد باقاعدگی اٹ اڈتننگک ہراٹی پیش رفت نا جاچ ءِ ہلنگک۔ کمیٹی بین الصوبائی،بین الوزارتی، محکمہ و ادارہ غاتا کمک نا بابت فوکل پوائنٹ نا کڑد ءِ ادا کیک۔ کمیٹی نا کنوینر ہر پانزدہ دے آن پد وزیراعظم ءِ سیل و سوات نا مون آ دننگ نا بابت بروک اڑاند،سلاہ و سوج و پیش رفت انا بابت بریف کیک۔
