اقوام متحدہ۔ 26 اگست (اے پی پی) اقوام متحدہ نا سیکرٹری جنرل انتونیو گوٹریش میانمار نا کمامدار آتیا زور شاغانے کہ روہنگیا باہوٹ آتا تنکی ءِ دمدستی ایسر کننگ نا گرج ءِ و غٹ باہوٹ آتا میانمار اٹ رکھ، منشاکارانہ، باوقار و سوگو پدی ہِننگ نا حالیت اس ودی کننگے۔ میڈیا نا رداٹ اقوام متحدہ نا سیکرٹری جنرل دا کلہو ءِ تدوک آ دے میانمار نا روہنگیا مسلمان اقلیت آتا جان تے بچفسا ہمسایہ ملک بنگلہ دیش اٹ پناہ ہلنگ نا 3 سال پورو مننگ آ جاری کرے۔ سیکرٹری جنرل نا ترجمان سٹیفن دوجارک پارے کہ سیکرٹری جنرل زور شاغاکہ دمدستی وڑاٹ است ہسون مصیبت آتا ایسر آن مہالو مریس وختی مفاہمت کن احتساب المی ءِ، ہرانا اصل زمواری میانمار نا کمامدارآتیا مریک۔ اوپارے کہ اقوام متحدہ روہنگیا تنکی آن زہمی بندغ آتون تفوک ءِ و داتنکی نا ایسری، سوگو شونداری، رخائن و مچ آ میانمار اٹی امن و سوگوی و انسانی حق اکن علاقائی راہشونک غٹ شریدار آتون اواری اٹ کاریم کننگ کن سنبرینگوک ءُ۔ اقوام متحدہ نا حساب وکتاب نا رداٹ اگست 2017ء آن داتم اسکان میانمار نا ریاست رخائن آن 7 لکھ 40 ہزار آن زیات روہنگیا مسلمان بیدادی آن نرسا بنگلہ دیش اٹ پناہ ہلنگ آ بیوس ءُ۔
