اسلام آباد۔ 02مارچ (اے پی پی) صدر مملکت ممنون حسین پارینے کہ بروک آ اسہ عشرہ ٹی دنیا ٹی بھاز زیات بدلی مننگ والا ئِ ہراٹی کشمیر نا ویل و عرب دنیا نا بھاز انگا ویل آک ایسر مریرہ۔ پنچ شنبے آ داڑے صدر مملکت ممنون حسین اردن نا مورخ عمر محمد نزل ارمورثی تون اوڑدہی ٹی پارے۔ عمر محمد نزل ارمورثی پنیئُ تاریخ دان اسے و 30 کتاب آتا مصنف ئِ۔ صدر مملکت پارے کہ کشمیر و فلسطین نا ویل ہمووخت اسکان ایسر مفک ہراوخت اسکان او الس نا است خواہی تا رداٹ مف ۔ صدر مملکت پارے کہ کشمیر نا ویل پیچیدہ اف بلکن اسہ صفائُ ویل اسے و کشمیر کشمیری تا ئِ۔ اومستی پارے کہ دا بھارت ہی ئِ ہرا ہمیشہ داویل ئِ ایسر کننگ اٹی ویل ودی کرینے و کشمیر نا الس نا خواہش آتا برعکس داڑآکوزہ کرینے۔ صدر مملکت پارے کہ کشمیر و فلسطین نا بہادر الس آجوئی کن جبر انا برخلاف جہد ئِ برجاتخانو۔ صدر مملکت پارے کہ پاکستان کشمیر و فلسطین نا الس نا آجوئی کن منصفانہ جہد نا مخ تفی ئِ جاری تخک۔ داوخت آ عمر محمد نزل ارمورثی صدر مملکت ئِ اسہ ٹیکی اس ہم پیش کرے۔
