بنجائی کابینہ فاٹا اصلاحات کمیٹی نا سفارش آتا اصولی منظوری ئِ تس
اسلام آباد۔ 02مارچ (اے پی پی) وزیراعظم محمد نواز شریف پارینے کہ بنجائی و صوبائی حکومت آتا اسیجائی زمواری ئِ کہ او بنجانا بست و بند اٹی قبائلی علاقہ (فاٹا) ، آزاد جموں و کشمیر و گلگت بلتستان نا شونداری و اودے بنجائی دنگ اٹی اتنگ کن مون آ بریر۔ پنچ شنبے نا دے وزیراعظم محمد نواز شریف تینا کماشی ٹی بنجائی کابینہ نا دیوان ہرا وزیراعظم ہاﺅس اٹی مس، آن تران کرسا پارے کہ پاکستان ہر شاری نا ئِ و ملک انا غٹ علاقہ غاتا الس نا شونداری وسیلہ غاتیا بریبر حق ئِ۔ بنجائی کابینہ نا دیوان اٹی فاٹا اصلاحات کمیٹی نا سفارش آتا اصولی منظوری ئِ تننگا۔ وزیراعظم پارے کہ آزاد جموں و کشمیر ، گلگت بلتستان و فاٹا نا مر مر انگاعلاقہ غاتیٹی رہینگوک آ پاکستانی تے لاہور، کراچی، پشاور و کوئٹہ ٹی رہینگوک آتیانبار آسراتی و خذمت آتا فراوانی ئِ المی جوڑ کننگک۔ اوپارے کہ فاٹا، گلگت بلتستان و آزاد جموں و کشمیر ئِ بنجائی دنگ اٹی اتنگ کن درکار کمکاری آ آمادہ مفروک آ دراصل صوبائیت ئِ مون آ تننگ ئُ۔ او پارے کہ فاٹا نا شونداری مچ آ قوم و ملک انا زمواری ئِ۔ اوپارے کہ دا کم شون ہلوک علاقہ غاتے بنجائی دنگ اٹی اتنگ و شونداری تننگ بیرہ اسلام آباد اٹی تولوک خلقت نا زمواری اف بلکن ہر پاکستانی ئِ دا عمل اٹی کڑد ادا کروئی مرے۔ وزیراعظم فاٹا نا الس نا حب الوطنی و قومی جوزہ نا ستائِ کرسا پارے کہ اونا تاریخ پاکستان تون مابت نا مثال آتیا پر ئِ ، فاٹا نا الس پاکستان نا وت واجہی، سالمیت و دفاع کن لازوال قربانی تسنو۔ اوپارے کہ وخت بسنے کہ فاٹا نا الس ئِ بنجائی دنگ اٹی اوار کننگے و اوفتے محرومی تے چٹفنگے۔ اوملکی یکجہتی کن قومی کن قومی جوزہ ئِ مون آ دننگ و ملک انا غٹ بشخ آتیٹی رہینگوک الس ئِ شونداری نا بھرم آتیان مستفید کننگ نا گرج آ زورشاغا۔ وزیراعظم پارے کہ ننے آ دازمواری مریک کہ شونداری ٹی پدسلوک آ علاقہ غاتیا زیات چکار تخن و دا علاقہ غاتا الس ئِ زند انا چندی بشخ آتیٹی شونداری نا وارخواہی فراوان کین۔ بنجائی کابینہ نا دیوان اٹی سیکرٹری سیفران ارباب شہزاد فاٹا اصلاحات کمیٹی نا سفارش آتا بارواٹی کابینہ ئِ بریفنگ تس۔ گورنر خیبر پختونخوا اقبال ظفر جھگڑا خصوصی سلہ غا دیوان اٹی بشخ ہلک۔
