سڈنی۔ 19 اگست (اے پی پی) آسٹریلوی حکومت ملک انا غٹ شاری تے کورونا وائرس نا ویکسین ءِ مفت فراوان کننگ نا پڑو ءِ کرینے۔ برطانوی نشریاتی ادارہ نا رپورٹ نا رداٹ آسٹریلوی وزیراعظم سکاٹ موریسن پارینے کہ یورپی دوائی جوڑ کروک کمپنی آسٹرازینیکا و آکسفورڈ یونیورسٹی نا تیارکروک کورونا وائرس نا ویکسین کلینکل ٹرائل نا مرحلہ ٹی ءِ و دابابت آسٹرازینیکا تون معاہدہ پک مسنے۔ اوداگمان نا درشانی ءِ کرے کہ دا ویکسین نا کاریم اٹ اتنگ ہرشاری کن المی مریک۔ آسٹریلوی وزیراعظم نا رداٹ کلینکل ٹرائل اٹی سرسہبی نا حالیت اٹ ویکسین نا فراوان کننگ بروک آ سال انا بناء آن مریک ولے ملک انا غٹ دونیم کروڑ آبادی ءِ ویکسین نا فراوانی ٹی منہ تُو لگنگ کیک۔ اوپارے کہ حکومت 95 درسد آبادی ءِ ویکسین فراوان کننگ نا ارادہ تخک۔ اوپارے کہ ویکسین آن بیرہ طبی بنداو تیا استثنیٰ تننگک و دابابت پالیسی ءِ حتمی دروشم اس تننگ انگ ءِ۔ آسٹریلیا ٹی کورونا وائرس نا ایکٹو کیس آتا کچ 7 ہزار و دا دین آن کہوک آتا کچ 450ءِ۔ ویکسین ہرا داوخت آ انسان تیا آزموندہ غاتا آخیریکو مرحلہ غاتیٹی ءِ، نا دوئی کننگ کن کیہی ملک آک آسٹرازینیکا تون رابطہ ٹی ءُ۔
