واشنگٹن، ریوڈی جنیرو، نئی دہلی۔ 17 اگست (اے پی پی) مچ آ دنیا ٹی کوروناوائرس آن زہمی بندغ آتا کچ اِراکروڑ 18 لکھ آن گدرینگانے وخت اس کہ دا ہلوک آ دین انا سوب آن داتم اسکان ہفت لکھ 73 ہزار آن زیات بندغ زوال کرینو۔ دوشنبے نادے آ میڈیا نا رداٹ چندی ملک آتیٹی کورونادین انا ناجوڑ آتا کچ و زوال کروک آتیٹی پدریسہ ودکی مننگ ءِ۔ گڑاس یورپی ملک آتیٹی دین انا پوسکن آ لہر نا ہم گڑتی ءِ ظاہر کننگ انگ ءِ۔ دنیا نا چندی ڈیہہ و ملک آتیٹی دا وخت آ کوروناوائرس نا فعال ناجوڑ آتا کچ 6489194ءِ۔ کورونا دین آن غٹ آن زیات زہمی ملک امریکہ ءِ ہراڑے زہمی تا کچ 55 لکھ 66 ہزارآن ودانے وخت اس کہ ملک اٹی داتم اسکان دین آن اسہ لکھ 73 ہزار آن زیات بندغ زوال کرینو۔ امریکہ ٹی کورونا نا فعال ناجوڑ آتا کچ 2470780ءِ۔ ملک اٹی داتم اسکان کوروناوائرس آن جم وڑاٹ 5566632بندغ زہمی مسنو وخت اس کہ مچ آ ملک انا چندی ریاست آتیٹی 173128بندغ تینا زند آن دوتے سلانو۔ کمامدارآتا پاننگ ءِ کہ ملک اٹی کورونا دین انا ناجوڑ آتیٹی پدریسہ ودکی مننگ ءِ، ریاست نیویارک دا ہلوک آ دین آن غٹ آن زیات زہمی مسنے۔ سرکاری حوالی نا رداٹ امریکہ ٹی کوروناوائرس آن زہمی 30 لکھ بندغ داتم اسکان دراخ جوڑ مسنو۔ داڑے برازیل اٹی کوروناوائرس آن زہمی بندغ آتا کچ 33 لکھ 40 ہزار آن زیات ءِ وخت اس کہ ملک اٹی داتم اسکان وائرس آن اسہ لکھ ہفت ہزار آن زیات بندغ زوال کرینو۔ برازیل کورونا دین آن بھاز زہمی مسنے۔ ملک اٹی تدوک آ 24 گھنٹہ ٹی 23101پوسکن ءُ ناجوڑ مون آ بسنے۔ کمامدارآتا رداٹ داڑآن اسہ دے اس مست برازیل اٹی کوروناوائرس نا 41576 کیس مون آ بسوسس۔ برازیل اٹی کوروناوائرس نا پوسکن آ کیس آتیان پد دا ہلوک آ دین آن زہمی بندغ آتا کچ 3340197مسنے۔ برازیل نا وزارت جان جوڑی نا حساب وکتاب نا رداٹ ملک اٹی داٹی 620 بندغ زوال کرینو۔ کمامدارآتارداٹ برازیل اٹی داتم اسکان کوروناغان زہمی 2432856بندغ دراخ جوڑ مسنو۔ کوروناوائرس آن ملک انا چندی علاقہ غاتیٹی زوال کروک آتیان پد کہوک آتا کچ ودسا 107879اسکان سرمسنے۔ برازیل اٹی کوروناوائرس نا فعال زہمی تا کچ 8 لکھ آن زیات ءِ۔ دا ہیت ذکر انا قابل ءِ کہ برازیل امریکہ غان پد کوروناوائرس آن زہمی مروک آ ارٹ میکو ملک ءِ۔ بھارت اٹی کوروناوائرس آن داتم اسکان 51 ہزار بندغ زوال کرینو۔ ملک اٹی کوروناوائرس نا پوسکن آ کیس آتیان پد دا ہلوک آ دین آن زہمی بندغ آتا کچ 2647663مسنے۔ کمامدارآتا پاننگ ءِ کہ بھارت اٹی داتم اسکان کوروناغان زہمی 1919842بندغ دراخ جوڑ مسنو۔ بھارت نا کیہی ریاست آتیٹی کورونادین داسہ ہم بھاز ترندی اٹ تالان مننگ ءِ۔
