ایکودیوان آن صفا مس پاکستان تنیا اف، تنظیم نا باسک ملک آک ویل آتا ایسری و شونداری نا سفر اٹی اوڑتون سلوک ئُ، معاشی جاچکار

اسلام آباد۔ 02 مارچ (اے پی پی) جہانی امور نا چاہندار و معاشی جاچکار عالیہ ایچ خان پارینے کہ ایکو دیوان آن پد دنیا آ صفا مسنے کہ پاکستان تنیا اف، تنظیم نا باسک ملک آک ویل آتاایسری و شونداری نا سفر اٹی اوڑتون سلوک ئُ۔ ریڈیو پاکستان تون ہیت وگپ کرسا اوپارے کہ تنظیم نا 13می دیوان سی پیک نا رداٹ اہمیت تخوک ئُ دیوان اسے داٹی چین نا وژن ون بیلٹ ون روڈ نا سوب پاکستان اٹی چین پاکستان اقتصادی راہداری ڈٹ بسنے ہراڑآن علاقائی ملک آتون اوار مچ آ دنیا نا اسہ ایلو ٹی رابطہ غاک سوگو مننگ و واپار ئِ مون آدننگ رسینگک۔ اوپارے کہ علاقائی کمکار تنظیم نا باسک ملک آک ہم داڈٹ انا ستائِ کرسا داٹی شراکت اٹی است خواہی نا درشانی ئِ کرینوانتئے کہ داڈٹ آن پد پاکستان تون اوار باسک ملک آتیان نیزگاری ئِ چٹفنگ اٹی کمک رسینگک۔ عالیہ ایچ خان پارے کہ پاکستان نا ساڑی حکومت نا ویژن تین پہ تینی اقتصادی تعلقداری و واپاری رابطہ غاتے سوگو کننگ نا ئِ و پاکستان اٹی مروک آ ہندادیوان آن پد غٹ ملک آتا نیام اٹ تین پہ تینی رابطہ ، واپار، و اقتصادیات اٹی گچینی بریک و دنیا غا داہیت صفا مریک کہ پاکستان تینا ویل آتا ایسری اٹی تنیا اف تنظیم نا ملک آک ویل آتا ایسری و شونداری نا سفر اٹی پاکستان تون اوار ئُ۔ پاکستان اٹی مروک آ سروکی دیوان اٹی ریاست نا سروک آتا شرکت دنیا کن یکجہتی نا کلہو اس تسنے و باسک ملک آک توانائی، انفراسٹرکچر ، ٹرانسپورٹ و واپار نا بشخ آتیٹی ڈیہہ و جہانی رابطہ غاتا کنڈا دنیا نا چکارئِ کرینے۔