اسلام آباد۔ 01 مارچ(اے پی پی) پاکستان اکنامک فورم نا چیئرمین ڈاکٹر ہمایوں اقبال شامی پارینے کہ علاقائی کمکار تنظیم نا دیوان آن باسک ملک آتون اوار ایلو ملک آتون تعلقداریک پین سوگو مریرہ۔ ریڈیو پاکستان تون ہیت وگپ کرسا اوپارے کہ پاکستان نا ساڑی سیاسی حالیت و بارڈر آ بے چیٹی نا سوب علاقائی کمکار تنظیم نا دیوان نا اڈتننگ ساڑی حکومت نا بھاز بھلو سرسہبی اسے۔ اوپارے کہ دیوان اٹی شریک ملک آتون ننا مذہبی و دودربیدہ ہی تعلقداریک ئُ و کانفرنس نا مسخت ہم علاقائی رابطہ غاتے سوگو کننگ نا ئِ ہراڑآن علاقائی واپار ئِ مون آ دننگ رسینگک۔ ڈاکٹر شامی پارے کہ تنظیم اٹی شرکت کروک آ ملک آک جغرافیائی اعتبار اٹ گنڈوک ئُ و دا ملک آتا کمک اٹ یورپی ملک آتسکان نا رسینگ ہم ممکن مننگ کیک ہراڑآن ننا داڑے خننگوک آ قدرتی معدنیات ، سِل و ٹیکسٹائل نا مصنوعات دا ملک آتا منڈی تے برآمد و دا ملک آتا مصنوعات دا ملک آتیٹی درآمد کننگ مریرہ۔
