اسلام آباد۔ 01مارچ (اے پی پی) ترکی نا صدر رجب طیب اردوان اقتصادی کمکار تنظیم اٹی اصلاحات نا عمل ئِ زوت آن زوت پورو کننگ، ای سی او سیکرٹریٹ نا انسانی وسیلہ غاتے سوگو کننگ و ڈٹ آتا ملکیت کن میکنزم اس تیار کننگ نا سلاہ ترسا پارے کہ ترکی دا مسخت نا دوئی کن ہروڑکمک فراوان کیک۔ چارشنبے نا دے داڑے 13می اقتصادی کمکار تنظیم (ای سی او) سروک دیوان آن تران کرسا پارے کہ ای سی او نا باسک ملک آتے توانائی نا بشخ اٹی کمکاری نا گرج ئِ۔ ترکی نا صدر کشت وکشار، ماحولیات و سیل و سوات نا بشخ آتیٹی ہم کمکاری نا گرج آ زورشاغا۔ اوپارے کہ ترکی بنداوی ڈھانچہ نا چندی بھلا ڈٹ آتیا عملدرآمد کننگ ئِ ہرا ترکی ئِ ہمسایہ ملک و ڈیہہ نا ایلو ملک آتون ریل ، روڈ، سمندر و فضائی کسر تا کمک اٹ گنڈک۔ داٹی استنبول اٹی دنیا نا غٹ آن بھلا ایئر پورٹ نا جوڑ جاڑ ہم اوار ئِ۔ رجب طیب اردوان سیاسی جھیڑہ غاتے ایسر کننگ و دہشت گردی نا خلیس آتون مون تننگ کن اسیجائی کوشست آتا گرج آ زورشاغا۔
