اسلام آباد۔ 01مارچ (اے پی پی) ایران نا صدر حسن روحانی پارینے کہ بیست ئُ یک می صدی ایشیانا مون آ بروک آ معیشت نا صدی ئِ و اقتصادی سرجزآک دیکی آن دے ٹکی ئِ گدریفنگ انگ ئُ ، ڈیہہ نا معاشی آخبت نا جوڑ جاڑ اٹی اقتصادی کمکار تنظیم اہم کڑدادا کننگ کیک دامسخت کن ای سی او نا ری سٹرکچرنگ نا گرج ئِ۔ چارشنبے آ داڑے اقتصادی کمکار تنظیم نا 13می سروک دیوان آن تران کرسا ایران نا صدر پارے کہ نن ای سی او ملک آتے ہائی ویز نا کمک اٹ اسہ ایلو تون گنڈنہ انتئے کہ رابطہ غاتے مون آ دننگ آن ہی ایشیاٹی شونداری و شونہالی ئِ المی جوڑ کننگ مریک۔ دارداٹ ایران اقتصادی کمکار تنظیم ئِ پین سوگو کننگ اٹی تینا کڑد ئِ ادا کننگ کن تیار ئِ ۔ اوپارے کہ 13می ای سی او سروک دیوان نا پاکستان اٹی اڈتننگ نیک شگون ئِ و داڑآن تنظیم نا مریس وختی ڈٹ آتیا عملدرآمد اٹی کمک رسینگک۔ سیکرٹری جنرل ای سی او خلیل ابراہیم سروک دیوان آن تران کرسا وزیراعظم نواز شریف نا سروک دیوان نا چیئرمین گچین مننگ آ مبارکبادی تس و اومیت ظاہر کرے کہ اونا دوراندیش سروکی ٹی ای سی او آخبت اٹی پین شون ہلیک۔ اوپارے کہ سروک دیوان نا اڈتننگ تنظیم نا کارکڑد و راہشونی کن بے کچ اہمیت تخک۔ ای سی او نا جم اٹنگا کارکڑد ئِ تالان کرسا او پارے کہ ای سی او ڈیہہ نا آبادی 471ملین و جی ڈی پی اسہ کھرب ڈالر آن گدرینگانے۔ اوپارے کہ باسک ملک آتے واپار، ٹرانسپورٹ و توانائی نا اہم بشخ آتیا چکار تخنگ نا سخت گرج ئِ۔ اومستی پارے کہ راہداری تیا خصوصی چکار تخنگ انگ ئِ ہرابارنی ٹی تموک باسک ملک آتے سمندر اسکان آسان رسینگ فراوان کینہ۔ اوپارے کہ ای سی او و وژن اٹی سیل و سوات ئِ اولیتی بشخ آتیٹی اوار کننگانے۔ آذربائیجان نا صدر الہام علیوف دیوان آن تران کرسا پارے کہ ڈیہہ ٹی شونداری و شونہالی کن باسک ملک آتا نیام اٹ انفراسٹرکچر ، رابطہ و ٹرانسپورٹ نا بشخ آتیٹی تین پہ تینی کمکاری آ خصوصی زورشاغا۔ اواسلام فوبیا نا ودوک آ رجحان آتا مذمت ئِ کرے و صفا کرے کہ اسلام امن نا مذہب اسے و دادے ہچ ئُ دروشم اسے ٹی بایدے دہشت گردی تون گنڈنگپ۔ صدر الہام نگورناکاراخ نا ویل آ پبی مخ تفی آ پاکستان نا منت واری ئِ ادا کرے ۔ تاجکستان نا صدر امام علی رحمانوف سروک دیوان آن تران کرسا پارے کہ واپار ، زرکاری و توانائی نا وسیلہ غاتا گچین کاریم اٹ اتنگ علاقائی کمکاری نا اہم ئُ عنصر اسے۔ ای سی او ملک آتے ڈیہہ ٹی ٹرانسپورٹ و توانائی نیٹ ورک نا آسراتی کن اسیجائی انفراسٹرکچر ڈٹ آتیا عملدرآمد آ خصوصی چکار تخنگ نا گرج ئِ۔ اوپارے کہ ای سی او نا سرجزآک باسک ملک آتیٹی راجی اقتصادی شونداری ، نیزگاری ٹی کمتی و زند انا معیار اٹی گچینی ٹی کمک و کمکار بایدے مریر۔ امام علی رحمانوف ٹرانسپورٹ کوریڈور نا کمک اٹ روڈ و سمندری کسرتا شونداری نا گرج آ زورشاغا۔
