نیویارک۔ 28 جولائی (اے پی پی) امریکہ ٹی تعینات پاکستان نا سفیر اسد مجید خان پارینے کہ حکومتی پالیسی تا سوب آن آئی ٹی نا بشخ تدوک آ اِراسال اٹی بھاز شون ہلک۔ پاکستان اٹ انفارمیشن ٹیکنالوجی گچین بھرم تروک ءُ بشخ اسے۔ داہیت ءِ او سے شنبے نادے آ نیویارک قونصلیٹ نا کنڈآن پاکستان و امریکہ نا نیام اٹ انفارمیشن ٹیکنالوجی نا بشخ اٹ کمکاری ءِ تالان کننگ نا سرحال آ ویبینار آن تران کرسا پارے۔ بنجائی سیکرٹری انفارمیشن ٹیکنالوجی شعیب احمد صدیقی، چیئرمین آئی ٹی بورڈ شباحت علی شاہ، نجیب غوری، چیئرمین و سی ای او نیٹسول و کیون خواجہ، بانی ٹیکنالوجیکس ویبینار اٹ بشخ ہلکر۔ داوخت آ ڈاکٹر اسد مجید خان بشخ ہلوک آتا ستاءِ کرےو انفارمیشن ٹیکنالوجی نا فائدہ غاتے مون آ تخا و پارے کہ ویبینار نا مسخت پاکستان نا انفارمیشن ٹیکنالوجی نا پڑاٹ گمانی کچ ءِ امریکہ ٹی درستی راستی کرفنگ نا ءِ۔ پاکستانی سفیر تینا بنائی ہیت وگپ آتیٹی پارے کہ پاکستان اٹ انفارمیشن ٹیکنالوجی گچین بھرم تروک ءُ بشخ اسے۔ حکومتی پالیسی تا سوب آئی ٹی نا بشخ تدوک آ اِراسال اٹ بھاز شون ہلک۔ اوپارے کہ کوویڈ۔ 19 نا رداٹ انفارمیشن ٹیکنالوجی نا بشخ اٹ پاکستان امریکہ کمکاری نا پوسکن ءُ وارخواہی دوئی ءِ۔ پاکستانی سفیر امریکی آئی ٹی کمپنی تے پاکستان اٹ آئی ٹی نا بشخ اٹ پبی اوار مننگ نا سلہ۔ بنجائی سیکرٹری انفارمیشن ٹیکنالوجی شعیب احمد صدیقی بشخ ہلوک آتے پاکستان اٹ آئی ٹی نا بشخ انا مون آ دننگ کن حکومتی گام گیج آتیان معلومدار کرے۔ اوپارے کہ انفارمیشن ٹیکنالوجی ٹی پاک۔ امریکہ کمکاری شاندار آخبت نا ضمانت ءِ۔ امریکن انفارمیشن ٹیکنالوجی نانجی بشخ انا راہشونک پاکستانی کمپنی تتون کاریم اٹ است خواہی نا درشانی ءِ کریر۔
