بیجنگ۔ 16 جولائی (اے پی پی) چینی صدر شی جن پنگ پارینے کہ چین اصلاحات و اوپن پالیسی ءِ مون آ دیک و چینی و درملکی کاروباری ادارہ غاتا زرکاری کن سازگار کاروباری چاگڑد اس فراوان کیک، نما چین اٹی زرکاری نا گچین کاری درست ءِ۔ چینی ریڈیو نا رداٹ چینی صدر گلوبل سی ای او کونسل نا نمائندہ غاتے اسہ ورندی چھٹی اسے ٹی نوشتہ کرے کہ مچ آ انسانیت اسہ بریبرءُ راج اسے ہراٹی کمکاری ءِ بایدے برجاتخنگے۔ اوپارے کہ چین پرامن شونداری نا کسر آ روان مریک، اواری اٹ، اسیجائی فائدہ، توازن و تین پہ تینی فائدہ تروک کمکاری نا سمت آ مون آ کاہک۔ یات سلے کہ گلوبل سی ای او کونسل 39 جہانی کمپنی تیا تالان اسہ راہشون فورم اسے۔ ساڑی آ دے تیٹی کونسل نا 18 سی ای او اسیجائی وڑاٹ چینی صدر نا پن اسہ چھٹی اس مون تسر و انسداد دین اٹی چین نا سرسہبی نا ستاءِ کریر۔ اوپارے کہ چینی صدر نا کنڈآن اوپن پالیسی و اصلاحات آ عمل کننگ نا تصورو عزم انا سوب آن اوفتا چین اٹی زرکاری نا عزم ہم پین پکا مسنے۔
