چلاس۔ 15 جولائی (اے پی پی) وزیراعظم عمران خان پارینے کہ دیامر بھاشا ڈیم انا تفنگ آن گلگت بلتستان خاص وڑاٹ چلاس اٹ شونداری نا پوسکن آ دور بناکیک، حکومت گلگت بلتستان تون اوار ملک انا پدسلوک علاقہ و مخلوق نا شونداری آ خصوصی چکار کننگ ءِ، پن بجلی نا پیداوار آن نئے بیرہ ماحول آ منفی زہم تمپک بلکن ملک اٹی اڑزآن بجلی ودی مریک، دا ڈٹ انا پوروی آن ملازمت آتا پوسکن ءُ وارخواہی ودی مریک۔ داخیال آتا درشانی ءِ او چارشنبے نادے آ گلگت بلتستان نا دورہ ءِ کننگ نا وخت آ داڑے السی مچی آن تران کرسا کرے۔ وزیراعظم عمران خان پارے کہ ہموقومک شون ہلیرہ ہرافک مون آ ہِننگ نا سجفرہ۔ مشکل ءُ فیصلہ کیرہ۔ السی لائخی تے تالان کننگ کن گام گیج کیرہ۔ انسانی وسیلہ غاتا شونداری آ زرکاری کیرہ۔اوپارے کہ انصاف نا فراوانی، کانود نا حکمرانی و جان جوڑی و تعلیم نا آسراتی تیا چکارکروک آ قومک شونداری نا مزل آتے طے کیرہ و اوظلم آن آجومریرہ۔ اوپرے کہ دوراندیشی آ عمل کروک آ قومک شون ہلیرہ ہراوڑ چین ترقی کرے۔ چین اٹی 30 سال انا ڈٹ جوڑ کننگا۔ اوپارے کہ ننا ملک اٹی کم مد ڈٹ جوڑ کننگا۔ گچین کاری تا رداٹ ڈٹ آتے جوڑ کننگا۔ اوپارے کہ اللہ تعالیٰ پاکستان ءِ دریاب، دیر اتون اوار بے پناہ وسیلہ تسنے۔ اوپارے کہ ننا دریاب آتیا پن بجلی ڈٹ آتا تفنگ نا بھلو وارخواہی اس ساڑی ءِ۔ مستین اٹ ہراتم تربیلا و منگلہ ڈیم ءِ جوڑ کننگا تو اوڑآن اڑزآن بجلی ودی مس و صنعت آتے مون آ دننگا ولے بجلی نا ڈٹ آتے ایندھن آ گدریفنگ آن کبین ءُ بجلی ودی مس۔ کرنٹ اکاؤنٹ نسخان اٹ ودکی مس۔ روپئی آزور ودنگ آن روپئی نا قدر کم مس۔ زرگزران ءِ نسخان رسینگا، زیات ڈالر پیشن ہننگ آن ہم روپئی آ زور ودا ہراڑآن کبینی ٹی ودکی مس۔ اوپارے کہ ہراتم نن اقتدار اٹی بسن تو ملک انا کرنٹ اکاؤنٹ نسخان 20 ارب ئس۔ اوپارے کہ درآمدی ایندھن آن بجلی پیداوار زہمی مس ۔ صنعت آک بھس مسر۔ اوپارے کہ دیامر بھاشا ڈیم ملک انا مسٹ میکو بھلا ڈیم ءِ۔ دا ڈیم انا تفنگ نا فیصلہ بھلو فیصلہ اسے۔ نن مستین اٹی ڈیم تفپرسا بھلو غلطی اس کرین۔ چین اٹی 5 ہزار بھلو ڈیم و جم 80 ہزار ڈیم ءُ۔ اوپارے کہ دیامر بھاشا ڈیم انا تفنگ نا ڈٹ 50سال مست جوڑ کننگا ولے داسہ داڑآ عمل کننگ انگ ءِ۔ اوپارے کہ دا قدرتی وڑاٹ ڈیم اکن جوان ءُ جاگہ اسے۔ نن آخبت اٹ ڈیم تا تفنگ نا بابت جامع ڈٹ بندی اس کرینن۔ اوپارے کہ پاکستان ہمو 10 ملک آتیٹی اوار ءِ ہرا گلوبل وارمنگ آن غٹ آن زیات زہمی مننگ کیرہ۔ نن گلوبل وارمنگ آن بچنگ کن 10 ارب درخت خلکونن۔ اوپارے کہ دیامر بھاشا ڈیم انا تفنگ آن بجلی نا پیداوار کن ایندھن نا درآمد اٹی کمتی بریک۔ اڑزآن بجلی ودی مریک۔ داڈٹ آن چاگڑد آ منفی زہم تمپک ۔ اوپارے کہ کورونا دین انا سوب مشکل حالیت آتا مون تروک ءِ۔ کورونا دین انا سوب آن بے روزگاری ٹی ودکی مس۔ دا ڈٹ آن ورناتیکن ملازمت آتا وارخواہی ودی مریک۔ اوپارے کہ گلگت بلتستان نا حکوتم ایس او پی تتون سیل و سوات نا بشخ ءِ ملا انتئے کہ گلگت بلتستان اٹی سیل و سوات نا بھلو وارخواہی اس ساڑی ارے۔ ایلو ملک آتیٹی سیل و سوات نا بشخ ءِ پدریسہ ملنگ ءُ۔ اوپارے کہ چلاس نا مخلوق ءِ مفت بجلی فراوان کننگک۔ اینخو سال گلگت بلتستان نا بجٹ اٹ ودکی کننگانے۔ اوپارے کہ گلگت بلتستان تون اوار پدسلوک آ علاقہ و مخلوق نا شونداری ننا اولیت ءِ۔ خیبر پختونخوا ٹی اوار مروک آ قبائلی ضلع غاتے ہم فنڈ تننگ اُن۔ بلوچستان نا پدسلوک آعلاقہ غاتیا ہم پبی چکار کننگ اُن ۔ اوپارے کہ دا ڈٹ انا پوروی آن گلگت بلتستان خاص وڑاٹ چلاس نا مخلوق ءِ فائدہ رسینگک۔
