نئی دہلی۔ 14 جولائی (اے پی پی) بھارت اٹی ہلوک آ کوروناوائرس نا 28 ہزار آن زیات پوسکن آ ناجوڑ آتیان پد زہمی تا کچ 9 لکھ 7 ہزار آن گدرینگانے۔ سے شنبے نادے آ بھارتی میڈیا نا رداٹ مچ آ ملک اٹی تدوک آ 24 گھنٹہ ٹی کوروناوائرس آن پین 553 بندغ زوال کریر ہراڑآن مرک آتا جم کچ 23727مسنے۔ بھارتی وزارت جان جوڑی نا جاری حساب وکتاب نا رداٹ تدوک آ 24 گھنٹہ ٹی ملک اٹی کورونا نا 28498 پوسکن ءُ کیس مون آ بسنے ہراڑآن زہمی تا کچ ودسا 907645مسنے۔ بھارت اٹی کوروناوائرس نا ناجوڑ آتا کچ اٹی ترندی اٹ ودکی مننگ ءِ۔ ملک اٹی داوخت آ کوروناوائرس نا فعال کیس آتا کچ 311806ءِ۔ کمامدارآتارداٹ ملک اٹی کوروناوائرس آن غٹ آن زیات زہمی ریاست مہاراشٹرءِ ہراڑے تدوک آ 24 گھنٹہ ٹی کوروناوائرس نا 6497 پوسکن ءُ کیس رپورٹ مسنے، ریاست اٹی داوخت آ 193 بندغ کوروناوائرس آن زوال کرینو۔ کمامدارآتا پاننگ ءِ کہ مہاراشٹراٹ کوروناوائرس آن زوال کروک آتا جم کچ 10 ہزار 482 ءِ۔ ملک انا قطبی دے ٹکی ریاست آتیٹی کوروناوائرس ترندی اٹ تالان مننگ ءِ۔
