اسلام آباد۔ 02 جون (اے پی پی) وزیراعظم عمران خان بنجائی دارالحکومت نا قدرتی حسن ءِ رکھ تخنگ و ماحولیات نا رکھ انا اہمیت آ زور شاغسا پارینے کہ مستین اٹی ناروا تجاوزات و کوزہ گیر آتا کارروائی تا سوب آن بنجائی دارالحکومت اٹی واقع گرین ایریہ غاتے بھاز نسخان رسینگانے، گرین ایریہ غاتا رکھ انا بابت ہروڑنا گام گیج اولیتی بنداو تیا ہرفنگے۔ داخیال آتا درشانی ءِ او سے شنبے نادے آ سلاہکار موسمیاتی بدلی ملک امین اسلم تون اوڑدہی ٹی گپ وتران کرسا کرے۔ داوخت آ خصوصی کمکار علی نواز اعوان، سیکرٹری داخلہ، چیئرمین سی ڈی اے و ایلو سینئر آفیسر آک ہم ساڑی ئسر۔ ملک امین اسلم بنجائی دارالحکومت نا قدرتی حسن و ماحولیات نا رکھ انا بابت وزارت ماحولیات نا کنڈآن بناکروک آ چندی ڈٹ آتیا وزیراعظم ءِ حوال تس۔ داڈٹ آتے ٹی بوٹینیکل گارڈن نا جوڑ کننگ، مارگلہ ہلز نیشنل پارک نا رکھ و مون آ دننگ، بنجائی دارالحکومت نا تزئین و آرائش و اسلام آباد چڑیاگھر نا اپ گریڈیشن کون آ ڈٹ آک اوار ءُ۔ بنجائی دارالحکومت اٹی واقع گرین ایریہ غاتا رکھ اکن دیوان اٹی فیصلہ کننگاکہ داوڑنا غٹ گرین ایریہ غاتا پیدواری ءِ کرسا اوفتے مارگلہ ہلز نیشنل پارک نا بشخ جوڑ کننگک۔ وزیراعظم بنجائی دارالحکومت نا قدرتی حسن ءِ رکھ تخنگ و ماحولیات نا رکھ انا اہمیت آ زور شاغسا پارے کہ مستین اٹی ناروا تجاوزات و کوزہ گیرآتا کارروائی تا سوب آن بنجائی دارالحکومت اٹی واقع گرین ایریہ غاتے بھاز نسخان رسینگانے۔ اوپارے کہ گرین ایریہ غاتا رکھ انا بابت ہروڑنا گام گیج اولیتی بنداو تیا چست کننگے۔ بنجائی دارالحکومت اٹی واقع کمرشل ایریاز، سرکاری و پرائیویٹ دفتر آتا پیشن و دامون ایمون گرین ایریہ تیٹی کار پارکنگ نا ویل آ ہیت کرسا وزیراعظم سلاہکار ماحولیات، سی ڈی اے و اسلام آباد انتظامیہ ءِ پارت کرے کہ دا ویل انا ایسری کن سلاہ تے بروک آ اِراہفتہ ٹی حتمی دروشم اس تننگے۔
