اسلام آباد۔ 02 جون (اے پی پی) وزیراعظم عمران خان نا کماشی ٹی بنجائی کابینہ نا دیوان سے شنبے نادے آ داڑے اڈ ہلک۔ بنجائی کابینہ ءِ شوگر انکوائری رپورٹ نا سفارشات آتا روشنی ٹی آخبت نا لائحہ عمل و تعلقدار ادارہ غاتا کنڈآن پین کارروائی آ سرجم حوال تننگا۔ وزیراعظم دیوان آن تران کرسا پارے کہ حکومت نا کنڈآن شوگر انکوائری نامسخت ہمو سوب و راستکی تے مون آاتوئی ءس ہرافتا سوب آن بورہ نا نہاد آتے ٹی ودکی بس و الس آ بے گرج بھاریم اس شاغنگا۔ اوپارے کہ انکوائری ٹی مون آ بروک آ غٹ راستکی تے مون آتخسا نظام اٹی ساڑی خامی تا درستگی و اصلاح کن گام گیج کننگک۔ دیوان اٹی فیصلہ کننگاکہ انکوائری رپورٹ ءِ مون آ تخسا مون آ بروک آ راستکی تا جاچ ءِ ہلنگ کن بین الوزارتی کمیٹی اس ٹہیفنگک ہرا چندی پہلو تیان رپورٹ نا جاچ ءِ ہلیک و ساڑی آ نظام بشمول ریگولیٹرز نا گچین کڑد انا بابت جامع اصلاحات کن سفارشات مرتب کیک۔ وزیراعظم پارے کہ دا گام گیج آتا مسخت داہمیت ءِ پک کروئی ءِ کہ آخبت اٹی الس ءِ استحصال و بے گرج نہاد آتے ٹی ودکی نا بھاریم آ رکھ کننگ مرے۔ کابینہ ءِ صوبہ غاتا کنڈآن خولم ہلنگ نا بابت داوخت اسکان نا پیش رفت و آخبت اٹی طلب و رسد نا کساس آتا بارواٹی سرجم حوال۔ دیوان اٹی فیصلہ کننگا کہ داہیت ءِ پک کننگ کن آخبت اٹ ملک انا اسہ کونہ اسے ٹی ہم خولم و نُت انا کاختی ودی مف و طلب و رسد اٹ توازن مرے، اسہ بڑزکو کہولی کمیٹی اس ٹہیفنگک ہرا دا بابت سفارشات مرتب کیک داڑتون اوار اوار کمیٹی فلورملز آتون تعلقدار باندات آتے ٹی اصلاحات نا بابت سفارشات تجویز کیک۔ وزیراعظم سیکرٹری داخلہ ءِ پارت کرے کہ اسمگلنگ نا توننگ نا بابت جوڑ ٹاسک فورس انا سفارشات آتے زوت آن زوت پیش کننگے تانکہ اسمگلنگ نا توننگ نا بابت پین کارروائی کننگ مرے۔ وزیراعظم کراچی ٹی پی آئی اے مسافر جہاز اٹی شہید مروک آ بندغ آتا خاہوت آتون دلی ڈکھ انا درشانی ءِ کرسا پارے کہ انسانی جان نا نسخان ناقابل تلافی ءِ نن مشکل نا داساہت اٹی غمزدہ خاہوت آتا ڈکھ اٹی بریبر نا شریک اُن و اوفتے تون سلوک اُن۔ کابینہ ءِ ملک اٹی کوروناناحالیت و وائرس نا تالانی نامون ءِ توننگ کن حکمت عملی آ سرجم حوال تسر۔ دیوان اٹی پبلک ٹرانسپورٹ، مارکیٹ، صںعت آتے ٹی کورونانا بابت جوڑ کروک آ ایس اوپی تیا پورو عملدرآمد آ زور شاغنگا۔ دیوان اٹی کوروناٹیسٹ، ٹریکنگ و زہمی بندغ آتے قرنطینہ غا گدریفنگ نا بابت ترتیب تروک آ ٹی ٹی کیو حکمت عملی (ٹیسٹنگ، ٹریکنگ، کورنٹی) نا ستاءِ کننگا۔ کورونانا بابت ملک اٹی جان جوڑی نا آسراتی تے گچین کننگ و ساڑی وسیلہ غاتا گچین و جوان کاریم اٹ اتنگ ءِ پک کننگ نا بابت ریسورس مینجمنٹ سسٹم نا فائدہ غاتا ہم ستاءِ کننگا۔ کابینہ دا ہیت آ است جمی نا درشانی ءِ کننگاکہ ملک اٹی کوروناوائرس نا ٹیسٹنگ نا بابت پاننگاکہ ملک اٹی ٹیسٹنگ لیبارٹری تا کچءِ اِرٹ آن ودفسا سد اسکان سرکننگانے۔ داوخت ملک اٹی ہڑدے ئی بنداو آ سی ءُ دو ہزار ٹیسٹ کننگ انگ ءِ بنائی دے تیٹی دالائخی بیرہ چار سد ئس۔ کابینہ کورونا نا بابت حکومتی حکمت عملی آ دا ہیت آ زورشاغا کہ ایس اوپیز آتا بابت الس اٹی آگاہی و شعور ءِ ودفنگے۔ کابینہ ءِ ملک اٹی ملخ آتا حالیت ،توننگ نا بابت چست کروک گام گیج و گونڈو مریس وختی حکمت عملی آ سرجم حوال تننگا۔ کابینہ ملخ آتا توننگ نا بابت گام گیج آتیا این ڈی ایم اے و پاک آرمی نا کارکڑدگی نا ستاءِ کرے۔ وزیراعظم دا ہیت آ زورشاغا کہ ادارہ غاتا کارکڑدگی ٹی گچینی اتنگ و اصلاحات نا عمل ءِ پین مون آدننگ آ خصوصی چکار کننگے۔
