پاکستان کوروناوائرس نا بابت بڑزکو کہولی دنگ آ سرمسنے، الس ءِ رکھی گام گیج آتیا پورو عملدرآمد کننگ نا گرج ءِ
اسلام آباد۔ 02 جون (اے پی پی) وزیرخارجہ شاہ محمود قریشی پارینے کہ پاکستان کوروناوائرس نابابت بڑزکو کہولی دنگ آ سرمسنے، الس ءِ رکھی گام گیج آتیا پورو عملدرآمد کننگ نا گرج ءِ۔ داہیت ءِ او بنجائی وزیر ڈٹ بندی اسدعمر تون گپ وتران کرسا پارے ہراسے شنبے نادے آ وزارت خارجہ ٹی اوڑتون اوڑدہی کرے۔ اوڑدہی ٹی ملک اٹی کورونانا دین انا ساڑی آحالیت و دانا تالانی ءِ توننگ کن کروک آ گام گیج آتون اوار تین پہ تینی است خواہی نا باندات آتیا گپ وتران کننگا۔ وزیر خارجہ پارے کہ کوروناوائرس نا جہانی دین نا حالیت آک مچ آ دنیا ءِ تینا پلویڑ اٹی ہلکونو و پاکستان کون آ پدتموک ملک آتے کورونادین انا سوب آن سنگین چیلنج آک مون تروک ءُ۔ اوپارے کہ پاکستان کوروناوائرس نا دین انا بابت بڑزکوکہولی دنگ آ سرمسنے دا وخت آ الس ءِ رکھی گام گیج آتیا عملدرآمد کننگ نا گرج ءِ۔ دین انا تالانی ءِ گچین وڑاٹ توننگ و طبی کاریم نا کچ اٹی ودکی کن حکومت غٹ گمانی گام گیج آتے چست کننگ ءِ۔ بنجائی وزیر ڈٹ بندی اسد عمر کوروناوائرس نا سوب آن پیشن نا ملک آتے ٹی وطن آ پدی بننگ نا چاری پاکستانی تے غٹ گمانی آسراتی فراوان کننگ و اوفتے زوت وطن آ پدی اتنگ کن کروک آکوشست آتا ستاءِ کرے۔
