چیئرمین واپڈا نا دیامر بھاشا ڈیم پروجیکٹ سائٹ نا دورہ

گلگت۔ 20 مئی (اے پی پی) چیئرمین واپڈا لیفٹیننٹ جنرل مزمل حسین (ریٹائرڈ) دیامر بھاشا ڈیم پروجیکٹ سائٹ نا دورہ ءِ کرے۔ ہرانا مسخت سائٹ آ کروک آ بست وبند آتا جاچ ءِ ہلنگ ئس تانکہ پروجیکٹ سائٹ آ کنٹریکٹر نا وخت آ موبلائزیشن ءِ پک کننگ مرے۔ دا وخت آ گپ وتران کرسا چیئرمین واپڈا پارے کہ دیامر بھاشاڈیم آ تعمیراتی کاریم نا وخت آ بناواپڈا نا اولیت ءِ۔ اوپارے کہ دیامر بھاشاڈیم اٹی دیر کوڑی کننگ نا جم اٹنگا لائخی 8.1 ملین ایکڑ فٹ وخت اس کہ بجلی ودی کننگ نا لائخی 4 ہزار 500 میگاواٹ ءِ و دا ملکی اقتصادیات ءِ سوگو کننگ اٹ اہم ءُ کڑداس ادا کیک۔ اوپارے کہ پروجیکٹ نا تفنگ آن انجینئرز و ایلو اسٹاف کن 16 ہزار 500 ملازم آتا وارخواہی ودی مریک۔ دیامر بھاشاڈیم انا تفنگ کن ہندی مخلوق نا قربانی تے خراج تحسین پیش کرسا اوپارے کہ زہمی تا آبادکاری و ہندی مخلوق نا زرگزرانی و معاشرتی شونداری کن پت سازی نا گام گیج آتیا 78 ارب 50 کروڑ روپئی خڑچ کننگک۔ اودا ہیت آ است جمی نا درشانی ءِ کرے کہ پت سازی نا گام گیج آتا رداٹ آب نوشی، آبپاشی،تعلیم و جان جوڑی نا ساڑی انفراسٹرکچر ءِ گچین کننگ کن 44 شونداری اسکیم تے پورو کننگانے۔ ہندی طالب علم آتے بڑزکو آب انا تعلیمی آسراتی سرکننگ کن چلاس کیڈٹ کالج نا تفنگ آخیریکو مرحلہ غاتے ٹی ءِ وخت اس کہ علاقہ ٹی بجلی نا گرج آتے پورو کننگ کن 3 میگاواٹ پیداواری لائخی نا تھک ہائیڈرو پاور پروجیکٹ ہم پوروی نا خڑک ءُ۔ داوخت آ جنرل منیجر دیامر بھاشا ڈیم پروجیکٹ عامر بشیر چوہدری اودے پروجیکٹ ایریاٹی مروک آ پیش رفت انابارواٹی حوال تس۔