ناشرکارانی ھلاپ ءَ سوبمندیں آپریشن راجی جزم ءُ سیکورٹی فورسز ءِ پیشہ وارانہ لیکہ ءِ ثبوت انت، چیئرمین سینیٹ

اسلام آباد۔27ستمبر  (اے پی پی): چیئرمین سینیٹ سید یوسف رضا گیلانی ءَ سیکورٹی فورسز ءَ را بلوچستان ءَ ناشرکارانی ھلاپ ءَ سوبمندیں آپریشن ءِ پد ءَ شگر ءُ منت گپت ءُ گوشت کہ صوبہ ءِ جتا جتائیں دمگاں 71 ءَ چہ گیش ناشرکارانی کوش یک مزنیں سوبمندی یے ۔ یک شمبے ءِ روچ ءَ سینیٹ سیکرٹریٹ ءِ نیمگ ءَ جاڑی بوتگیں بیان ءِ تہ ءَ چیئرمین سینیٹ ءَ گوشت کہ ناشرکار آنی ھلاپ ءَ موثر آپریشن سیکورٹی فورسز ءِ مزن پیشہ وارانہ ، بہادری ءُ آپریشنل تیاری ءِ آدینک انت وھدیکہ بلوچستان ءَ ناشرکار آنی بازیں پناہ گاہ آنی ھلاسی امن ءُ ایمنی ءِ واستہ ھاسیں گامگیج انت۔ سید یوسف رضا گیلانی ءَ گوشت کہ پاکستان ءَ ناامنی ءِ شنگ کنگ ءَ ناشرکاریں عناصر ءُ آھانی آسراتی ءِ ھلاپ ءَ آپریشن سرجمیں زور ءَ گوں برجاہ دارگ بہ بیت، ءُ درملکی سرپرستی ءُ کمک ءَ گوں ناشرکاری ءِ ھلاپ ءَ جنگ راجی ایمنی ءِ واستہ المی اِنت۔ آئی ءَ گوشت کہ ناشرکاری ءِ ھلاپ ءَ جنگ ءَ سیکورٹی فورسز ءَ بے دروریں قربانی داتگ ءُ راج وتی شہید آنی منت وار اِنت ءُ غازی آنی ھزمت آناں مدام شرپ ءُ ستا ءِ گوما چارگ بیت۔ چیئرمین سینیٹ ءَ گوشت کہ پاکستان ءِ ایمنی، حاکمیت ءُ امن ءِ رکھینگ ءِ واستہ سیکورٹی فورسز ءِ جزم سرجمیں راج ءِ واستہ ھمت ءُ دل یکیمی ءِ وسیلہ انت۔ آئی ئَ کامیابیں آپریشن آنی تہ ئَ بھر زرتگیں توامیں افسر ءُ فوجی آناں شگر ءُ منت ءِ درشان کت ءُ شہید آنی مزنیں کُربانی آناں سلام دات۔