صدر ءِ مملکت ءِ جہانی رسائی ءِ روچ ءِ موہ ءَ کلوہ

ہر شہری ءِ آئینی حق ءِ سرا پابند انت کہ آ زانتکاری ءِ دسترس ءَ بہ کنت، زانتکاری ءِ دسترس ءِ ھاتر ءَ درستیں ءُ معتبریں جمہوریت ءِ ھاتر ءَ سک باز المی انت

اسلام آباد۔28ستمبر  (اے پی پی): صدر آصف علی زرداری ءَ پاکستان ءِ ھر شہری ءِ زانتکاری ءِ رسائی ءِ ھک ءِ سر ءَ یک رندے پدا گوشت کہ ڈیجیٹل پلیٹ فارم، مصنوعی ذہانت ءُ ایندگر نوکیں ٹیکنالوجی ءِ تیزی ءَ گوں دیمروئی کنوکیں چاگرد ءَ راست ءُ معتبریں زانتکاری ءِ رسگ نہ ایوک ءَ گیشیں ھاسیں زانتکاری ءِ لوٹ بوتگ بلکیں جمہوریت ءِ واستہ ھم سک باز المی اِنت۔ ھمگرنچیں ادارگ، سرکاری تب ءِ اھوالکار، رسانکدر ءِ ادارگ، رابطہ کاری ءِ پڑ ءَ گوں ھمگرنچیں ماہرین، پٹ ءُ پولکار ءُ ایندگر ماہرین آنی کرد ءِ سر ءَ دلگوشی دیگ بہ بیت دانکہ شہری تیزی ءَ گوں بدل بوھوکیں زانتکاری ءِ چاگرد ءَ جوانیں رھشونی ءِ رسگ ءَ بہ رس اَنت۔ آئی ءَ اے گپ 28ستمبر ءَ برجم دارگ بوھوکیں زانتکاری ءِ سر ءَ جھان ءِ رسائی ءِ روچ ءِ موہ ءَ وتی پیغام ءِ تہ ءَ گوشت۔صدر آصف علی زرداری ءَ زانتکاری ءِ سر ءَ جھان ءِ رسائی ءِ روچ ءِ موہ ءَ پاکستان ءِ اے جزم ءِ سر ءَ پدا زور پر دات کہ ھر شہری ءِ زانتکاری ءِ رسائی ءِ ھک ءَ را دل یکیمی کنگ بہ بیت ھاسیں رنگ ءَ 2018 ءِ جیڈھ آناں پبلک ءِ بھر زوری کنگ بہ بیت۔ راجمانی زند ءَ ھما وھد ءَ بامردیں رنگے ءَ دیم ءَ آرگ بہ بنت کہ آ وھد ءِ سر ءَ ، مستند ءُ معتبریں زانتکاری ءَ سر بہ بنت ۔ آئی ءَ گوشت کہ پاکستان ءِ آئین ءَ اے ھک ءِ ھاتر ءَ ھاسیں بنیات ءِ پجارینگ بوتگ ۔ ہژدہمی آئینی ترمیم ءَ اظہار ءِ آزادی ءِ آئینی چارچوب ءَ را گیش مھکم کتگ ءُ آرٹیکل 19-A ءِ ھوار کنگ بوتگ کہ ایشی ءِ تہ ءَ ھر شہری ءَ را راجمانی ارزشت ءِ دراھیں جیڈھ آنی سر ءَ زانتکاری ءِ دسترس ءِ حق دیگ بیت، ایشی ءِ تہ ءَ ھمگرنچیں رھبند ءُ کانود ءِ رد ءَ معقولیں بندش ھوار اَنت۔ صدر مملکت ءَ گوشت کہ ایشی ءَ ابید وفاقی تک ءَ رائٹ ٹو انفارمیشن ایکٹ 2017ءَ ھم زانتکاری ءِ رسگ ءِ واستہ کانودی فریم ورک ءِ پجارینگ بوتگ۔ البت مرچی زانتکاری ءِ زانگ ءِ حق گیشتر پیچیدہ بوتگ۔ ڈیجیٹل پلیٹ فارمز، مصنوعی ذہانت ءُ دگہ نوکیں ٹیکنالوجی ءِ تیزی ءَ گوں زانتکاری ءِ جوڑ کنگ، شنگ کنگ ءُ کارمرز کنگ ءِ راہ بدل بوتگ۔ آئی ءَ گوشت کہ نوں چیلنج ایوک ءَ اے نہ اِنت کہ زانتکاری دست کپ اِیت یا نہ اِنت، بلکیں اے ھم اِنت کہ شہری معتبریں زانتکاری ءُ ھما مواد ءِ نیام ءَ فرق کت کن اَنت کہ دروگ، رد ءُ بند داتگ یا زانت ءُ زانت ءَ گمراہ کنگ ءِ ھاترا جوڑ کنگ بوتگ۔ صدر آصف علی زرداری ءَ گوشت کہ زانتکاری ءَ را جتا جتائیں عناصر ءِ نیمگ ءَ چہ رد ءُ بند دیگ یا سلاہ ءِ رنگ ءَ کارمرد کنگ بیت کنت، ایشی ءِ تہ ءَ سرکاری ءُ غیر سرکاری کارکن، ناشرکار ءُ مجرمانہ نیٹ ورک ءُ بے کنٹرول ءُ بے حد زوراکیں ٹیکنالوجی کمپنی ھوار اَنت۔ اے جاوراں راست ءُ معتبریں زانتکاری ءِ رسگ نہ ایوک ءَ گیشتر مشکل بوتگ بلکیں پہ سرپدیں جمہوریت ءَ انتہائی المی بوتگ۔ اے جاور ھال ءِ لوٹ اِنت کہ راجمانی تب ءِ اھوالکار، رسانکدر ءِ ادارگ، رابطہ کاری ءِ ماہرین، پٹ ءُ پولکار ءُ دگہ پیشہ ور آنی کرد ءِ سر ءَ گیشتر دلگوش دیگ بہ بیت دانکہ شہری تیزی ءَ گوں بدل بوھوکیں زانتکاری ءِ چاگرد ءَ شرتر رھادگ بہ بنت۔ پمیشکا مئے پسو انچوش بہ بیت کہ شہری ءِ زانگ ءِ حق ءِ رکھینگ بہ بیت وھدے کہ تجارتی ردیں ھال ءُ اھوال ءُ ردیں ھالانی ھلاپ ءَ جنگ ءِ جھد جائزیں راجمانی مفاد ءِ صحافت ، منصفانہ تنقید ءُ بامردیں راجمانی بحث ءِ سرکوب کنگ ءِ وسیلہ جوڑ مہ بیت۔ صدر ءِ مملکت ءَ گوشت کہ سرکاری ادارگ آنی نیمگ ءَ چہ شفافیت، احتساب ءُ ذمہ واریں رابطہ کاری المی اِنت۔ شہریاں چہ معتبریں وسیلگاں چہ مستندیں زانتکاری ءِ رسگ ءِ وس ءُ واک بہ بیت، ھاسیں رنگ ءَ ھما جیڑھانی سر ءَ کہ آھانی زند ءَ را براہ راست اثرمند کن اَنت۔ صدر آصف علی زرداری ءَ اے گپ ءِ سر ءَ زور پر دات کہ اے روچ ءَ بیا اِت کہ ما شہری آنی زانتکاری ءِ رسگ ءِ ھک ءِ رکھینگ ءُ ھما ادارگ ءُ پیشہ وارانہ عمل آناں گیش مھکم کنگ ءِ وتی جزم ءِ پدا پدر کن ایں کہ اے ھک ءِ رکھینگ ءُ دیمروئی ءِ واستہ تیزی ءَ گوں بدل بوھوکیں زانتکاری ءِ چاگرد ءَ المی اَنت۔