مبصر مشن ءِ اقوام متحدہ نا سیکرٹری جنرل نا پن آ یات داشت پیش کرے

اقوام متحدہ مقبوضہ کشمیر اٹی انسانی حق انا حالیت آتا جاچ ءِ ہلنگ کن خصوصی نمائندہ پن، فیکٹ فائنڈنگ مشن گدریفنگے، کل جماعتی حریت کانفرنس نا خواست
اسلام آباد۔ 20 مئی (اے پی پی) کل جماعتی حریت کانفرنس اقوام متحدہ غان خواست کرینے کہ او مقبوضہ کشمیر اٹی انسانی حق انا حالیت آتا جاچ ءِ ہلنگ کن خصوصی نمائندہ اس پن کے، جموں و کشمیر نا جھیڑہ نا ایسری کن سلامتی کونسل نا قرارداد آتیا عملدرآمد کننگے، کشمیر اٹی انسانی حق انا خلاف ورزی تا جاچ ءِ ہلنگ کن فیکٹ فائنڈنگ مشن گدریفنگے۔ چارشنبے نادے آ کل جماعتی حریت کانفرنس نا کنڈآن مچی ٹی اقوام متحدہ نا سیکرٹری جنرل نا پن آ یات داشت مبصر مشن ءِ پیش کننگا ہراٹی بھارت ءِ پاننگانے کہ او مقبوضہ کشمیر اٹی آبادی نا تناسب ءِ بدل کننگ نا کوشست ءِ تورے، مقبوضہ کشمیر اٹی الس تون کوویڈ۔ 19 نا توننگ کن تمیز کننگ آن پاناد کے و اوفتے طبی آسراتی تا فراوانی ءِ پک کے۔ بھارت ءِ پاننگانے کہ او مون انگا کانود نا چٹفنگ و غیر ریاستی باتی تے ڈغار تا گدریفنگ نا کانود ءِ چٹفے۔ قرارداد اٹی پاننگانے کہ مقبوضہ کشمیر اٹی صحافت آ قدغن و صحافی تے اوفتا کسبی زمواری تا پورو کننگ آ جیل تیٹی شاغنگ آ گڑتی نا درشانی ءِ کرسا دادے اسہ ڈوہ اس گوندنگانے۔ قرارداد اٹی پاننگانے کہ مچ آ دنیا کورونا وائرس تون جنگ تننگ ءِ ولے بھارتی فوج لین آف کنٹرول آ سول آبادی ءِ شست کننگ ءِ۔ کشمیر اٹی مخلوق ءِ دزگیر کننگ نادرست آ ہند آتیا گدریفنگ انگ ءِ۔ جعلی مقابلہ و دزگیرمخلوق ءِ ماروائے عدالت خون ءِ کننگ انگ ءِ ، دا گام گیج اقوام متحدہ نا دمدستی چکار نا چاری ءِ۔ قرارداد اٹی کل جماعتی حریت لیڈر، سیاسی بندی ، وکلاء، راجی و انسانی حق انا کارندہ و ایلو دزگیر ورناتا دمدستی یلہ کننگ نا خواست ءِ کننگانے۔