اسلام آباد۔ 20 مئی (اے پی پی) وزیراعظم نا سلاہکار واپار و زرکاری عبدالرزاق داؤد پارینے کہ پیشن نا ملک پاکستان سفارتی مشنز اٹی تعینات کامرس اینڈ انویسٹمنٹ آفیسر آتے علامہ اقبال انڈسٹریل سٹی ٹی زیات آن زیات زرکاری اتنگ کن مارکیٹنگ نا خصوصی ٹاسک تننگک، فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی (فیڈمک) نا دا اولیتی خصوصی اقتصادی زون سی پیک ڈٹ انا بشخ ءِ۔ داخیال آتا درشانی ءِ او چارشنبے نادے آ داڑے اڈ ہلوک آ دیوان اٹی فیڈمک نا چیئرمین میاں کاشف اشفاق تون گپ وتران کرسا کرے۔ داوخت آ ایلو تکنیکی چاہندار آتیا بیدس چیف آپریٹنگ آفیسر محمد عامر سلیمی ئسک ہم ساڑی ئسر۔ عبدالرزاق داؤد پارے کہ 50 آن زیات ملک آتے ٹی تعینات دا ٹریڈ و زرکاری آفیسر آک تعلقدار ملک آتیان گمانی زرکار آتے فیڈمک نا ون ونڈو آپریشن تون مربوط کننگ نا پابند مریرہ و دا زرگزرانی زون تا انتظامیہ ءِ دا ملک آتون واپاری گمان آتا بارواٹی معلومدار تخرہ ہراڑآن پاکستانی مصںوعات آتا مون آ دننگ و مارکیٹنگ و ملکی برآمد آتا حجم ءِ ودفنگ اٹ کمک ملک۔ وزارت واپار مہالو آن پیشن نا ملک تعینات ٹریڈ و زرکاری آفیسر آتے ملکی مصنوعات آتے کن پوسکن و عمل نا قابل مارکیٹ آتا پٹنگ و پاکستانی برآمد کنندگان آتا برآمدی آرڈرز آتے منسوخ مننگ آن بچفنگ کن ٹاسک اس تسنے۔ عبدالرزاق داؤد پارے کہ حکومت کوویڈ۔ 19 آن پد زرگزرانی نمو ءِ برقرار تخنگ و مون تروک حالیت آتا جوان ءُ ایسر اس پٹنگ کن سرگرم عمل و ملک ءِ کنزیومر اکانومی آن انویسٹ اکانومی جوڑ کننگ کن سنبرینگوک ءِ۔ فیڈمک نا سروک میاں کاشف اشفاق علامہ اقبال انڈسٹریل سٹی نا بابت پارے کہ بیرہ اسہ ہی ڈٹ اٹی 400 صںعت جوڑ مننگ آن بیدس کم و ود دونیم لکھ بندغ ءِ روزگار نا وارخواہی دوبریک، دا ڈٹ اٹی کم و ود 450 ارب روپئی نا درملکی و ہندی زرکاری گمانی ءِ و شونداری کاریم ءِ ترند رفتاری اٹ پورو کننگ انگ ءِ۔ اومستی پارے کہ صارف آتے پوسکن آ آسراتی تا فراوانی و ون ونڈو آپریشن نا کمک اٹ اوفتا ویل آتا ایسر فیڈمک نا اولیت ءِ و ایم تھری ڈٹ انا پوروی آن پد زرکار آتا پت بحال مننگ ءِ۔ وزیراعظم عمران خان و اونا زرگزرانی ٹیم انا پالیسی تا ستاءِ کرسا چیئرمین فیڈمک پارے کہ حکومت چندی زرگزرانی بشخ آتا شونداری آ چکار کرسا ادائیگی تا توازن نا مون ءِ توننگ کن پبی کوشست کننگ ءِ۔ اوپارے کہ بزنس کمیونٹی نا ویل آتا ایسر اٹ عبدالرزاق داؤد نا کڑد ستاکڑزک و اونا کوشست آتے اٹ کاروباری برادری نا پت بحال مسنے۔ کاشف اشفاق پارے کہ گچین شرح نموو ہندی پیداوار ءِ جہانی مارکیٹ اٹ زیات مسابقتی جوڑ کننگ کن زرگزران نا غٹ بشخ آتے ٹی تکنیکی شونداری بھاز المی ءِ۔ اوپارے کہ وزیراعظم عمران خان اسہ دیانتدار ءُ لیڈر اسے و اونا دیانتداری و ساکھ آن ہم ہندی و درملکی زرکارآتے پاکستان اٹ زرکاری نا ترغیب ملانے۔
