بنجائی وزیر بحری امور سید علی حیدر زیدی تون پاکستان اٹی چین نا سفیر یاؤجنگ انا اوڑدہی

اسلام آباد۔ 18 مئی (اے پی پی) بنجائی وزیر بحری امور علی حیدر زیدی تون پاکستان اٹی چین نا سفیر یاؤجنگ اوڑدہی کرے ہراٹی کراچی کن اسہ بھلو ڈٹ اسے آ گپ وتران کننگا۔ وزارت بحری امور نا کنڈآن جاری بیان اٹی پاننگانے کہ بنجائی وزیر بحری امور نا وژن ءِ کہ او پاکستان ءِ میری ٹائم نیشن اٹ بدل کننگ و خاص وڑاٹ کراچی نا شونداری و اودے ایلو بندرگاہی شار تا بریبر اتنگ خواہک ہراڑکن او ڈٹ آتے ترندی اٹ عملی دروشم اس تننگ نا کوشست کننگ ءِ ہرانا رداٹ تجاوزات والا ڈغار ءِ منظم وڑاٹ ڈٹ بند ہنکینی علاقہ غاتے ٹی بدل کینہ، ہراٹی غٹ بنداوی آسراتی ساڑی مریک۔ دا ڈٹ آن اومیت کننگک کہ دا براہ راست درملکی زرکاری ءِ ہم چکک۔ اوڑدہی ٹی بنجائی وزیر علی زیدی لاس اینجلس و نیو یارک بندرگاہ تا مثال آتے حوالہ ءِ ترسا پارے کہ جہانی کہول آ بندرگاہ شارتے چلیفرہ ہراکان بندرگاہ تا محصولات آتے الس نا گچینی کن کاریم اٹ اتنگک۔ او است ہسونی نا درشانی ءِ کرسا پارےکہ آجوئی آن پد آن کراچی ءِ گوجالنگ انگ ءِ، پراپرٹی مافیا و ڈغارتیا کوزہ کروک آتا ملی بھگت اٹ وسیلہ غاتا بشخنگ بالکل بریبر اف۔ 2020 ء نا اولیکو سہ ماہی ٹی لانچ اکن تیار کروک آ ڈٹ کورونادین انا تالانی ناسوب آن تاخیر نا گواچی مس۔ پاکستان اٹی بلیواکانومی نا تصور ءِ مون آ درسا وزارت بحری امور سمندری وسیلہ تون گچین وڑاٹ فائدہ ہرفنگ و بندرگاہ تیا کارگو نا وخت آترسیل و کلیئرنس کن ڈٹ آتا بناءِ کیک۔ شفاف و غیر امتیازی سلوک اتون اسہ گچین نظام اس جوڑ کننگ انگ ءِ۔ اوڑدہی ٹی علی زیدی چینی سفیر ءِ آگاہ کرے کہ ساڑی آ کورونادین اٹی ہم بندگاہ نا کارروائی بیدس مداخلت آن برجاءِ ۔ داکان بیدس، علی زیدی سفیر ءِ معلومدار کرے کہ گہری سمندری ماہی گیری ءِٰ بحالی نا موکل تننگانے، جان جوڑی نا ایس او پی نا تعمیل آن پد تانکہ ماہی گیر ماہی گیری نا چٹفنگ نا سوب آن زہمی مفس۔ پاکستان اٹی چین نا سفیر دا سخت انگا وخت اٹی وزارت بحری امور نا ایس او پی تا سختی اٹ پابندی و داڑتون اوار اوار روزگار و رزق انا رکھ انا دوجہتی حکمت عملی نا ستاءِ کرے۔