بھارتی سفارتکار ءِ دفترخارجہ غا بٹنگسا 17 مئی آ کنٹرول لین نا کھوئی رٹہ سیکٹر اٹ جنگ بجدی نا خارتس خلاف ورزی تیا برانز کننگا، دفترخارجہ

اسلام آباد۔ 18 مئی (اے پی پی) بھارتی سینئر سفارتکار ءِ دفترخارجہ غا بٹنگسا 17 مئی آ گوزہ گر بھارتی فوج انا کنڈآن لین آف کنٹرول (ایل او سی) نا کھوئی رٹہ سیکٹر اٹی جنگ بندی نا خارتس خلاف ورزی تیا بھاز برانز ریکارڈ کرفنگا۔ بھارتی فوج انا خارتس سم کاری ٹی بے گناہ شاریک بھاز ٹھپی مسوسر۔ دوشنبے نادے آ ترجمان دفترخارجہ نا رداٹ 17 مئی آ خارتس جنگ بندی نا خلاف ورزی تیا برانزی مراسلہ اس بھارتی سینئر سفارتکارنا دوٹی ترسا پاننگاکہ کوزہ گر بھارتی فوج ایل او سی و ورکنگ باؤنڈری نا پدریسہ خلاف ورزی کرسا آرٹلری ، بھلو و خودکار سلہہ غاتا کمک اٹ لس شاری آبادی ءِ شست کننگ ءِ۔ شاری آبادی ءِ دانستہ وڑاٹ شست کننگ بے کچ است ہسونی ، انسانی عظمت ووقار، جہانی انسانی حق و جہانی انسانی کانود آن چپ ءِ۔ بھارت نا کنڈآن جنگ بندی نا دا خلاف ورزی تیان علاقائی امن و سلامتی ءِ بھاز خطرہ مون تروک ءِ ہراٹی سٹریٹجک غلطی نا دروشم اس پیش تمنگ کیک۔ بھارت اینخو سال اٹی 1081 وار خارتس جنگ بندی نا خلاف ورزی کرینے۔ ایل او سی آ بے چیٹی تیٹی ودکی آن بھارت مقبوضہ کشمیر اٹی انسانی حق انا سنگین خلاف ورزی و بیدادی تیان جہانی چکار ءِ اسہ کنڈ کننگ کپک۔ بھارت آ زور شاغار کہ او 2003 ء نا جنگ بندی معاہدہ نا پاسداری ءِ کے، جنگ بندی نا خلاف ورزی تا دا واقعہ غاتا جاست وپاست ءِ کرفے۔ بھارتی فوج ءِ جنگ بندی نا شرف نا حکم ایتے۔ ایل او سی و ورکنگ باؤنڈری آ اونا روح انا رداٹ امن ءِ برقرار تخے۔ اوزور شاغاکہ اقوام متحدہ نا سلامتی کونسل نا قرارداد آتا رداٹ بھارت اقوام متحدہ نا فوجی مبصرین(یو این ایم او جی آئی پی) ءِ تینا کڑد ءِ ادا کننگ نا موکل ایتے۔