وزیراعظم ناسلاہکار خزانہ و محصولات ڈاکٹر عبدالحفیظ شیخ نا ڈاکٹر اکرام الحق تون ویڈیو لنک انا کمک اٹ اوڑدہی ٹی گپ وتران

اسلام آباد۔ 18 مئی (اے پی پی ) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ حکومت بجٹ نا تیاری ٹی غٹ اسٹیک ہولڈرز آتون سلابت کن تیار ءِ، بجٹ ساڑی آ زرگزرانی حالیت آتا خواست و زرگزران نا ساختی ویل آتا اختراعی ایسر نا رداٹ مریک۔ اوداہیت ءِ دوشنبے نادے آ داڑے وزارت خزانہ ٹی ویڈیو لنک انا کمک اٹ ڈاکٹر اکرام الحق تون اوڑدہی ٹی گپ وتران کرسا پارے۔ اوڑدہی ٹی ملک اٹی گچین ڈیٹارسینگ و تصدیقی میکنزم نا کمک اٹ خراج نا ساخت ءِ گچین کننگ کن چندی سلاہ تا جاچ ءِ ہلنگا۔ چیئرپرسن ایف بی آر، سیکرٹری خزانہ ومسکوہی سیکرٹری خزانہ ڈاکٹر وقار مسعود خان ئسک ہم داوخت آ ساڑی ئسر۔ وزیراعظم نا سلاہکارمچ آ ملک انا گچین مروک مارکیٹ و ایوانہائے صنعت و واپار آن ڈیٹا جمع کننگ نا رداٹ ڈاکٹر اکرام الحق نا کاریم نا ستاءِ کرے۔ ڈاکٹر اکرام الحق وزیراعظم نا سلاہکار ءِ محصولات جمع کننگ نا عمل ءِ گچین کننگ کن ڈیٹانا ہلنگ و اونا پک کننگ کن گڑاس تکنیک آن معلومدار کرے۔ ڈاکٹر عبدالحفیظ شیخ پارے کہ دا مشق انا بنداوی مسخت چاہندار آتون سلابت ءِ تانکہ ملک اٹی محصولات جمع کننگ نا نظام اٹ مروک آ بنداوی خامی تے مر کننگ کن گچین ءُ سلاہ مون آ بننگ کے۔ اوپارے کہ بجٹ نا تیاری ٹی ننے ساڑی حالیت آتیان ودی مروک آ چیلنج آتا بارواٹی زیات تیار وفعال مننگ نا گرج ءِ۔ حکومت بجٹ نا تیاری ٹی غٹ اسٹیک ہولڈر آتون سلابت کن تیار ءِ۔ بجٹ ساڑی آ زرگزرانی حالیت و زرگزران نا ساختی ویل آتا اختراعی ایسر نا رداٹ مریک۔ اوڈاکٹر اکرام الحق ءِ تینا سلاہ و سوج و سلاہ تے جامع و عملی وڑاٹ وزارت تون شیئرکننگ نا پارت کرے تانکہ اوفتے بروک آ بجٹ نا بشخ جوڑ کننگ مرے۔ اوگچین بجٹ جوڑ کننگ کن ایف بی آر ءِ چندی ذریعہ اٹ ڈیٹاہلنگ نا ہم پارت کرے۔