اسلام آباد۔ 15 مئی (اے پی پی) وزیراعظم نا خصوصی کمکار جان جوڑی ڈاکٹر ظفرمرزا پارینے کہ پاکستان اٹی 6آن 8 ہفتہ ٹی کورونا آن بچنگ نا دوا جوڑ مننگ بناکیک، دا گام گیج آن پاکستان اٹی کورونانا ناجوڑ و ہیلتھ ورکرز آتے کوویڈ۔ 19 نادین اتون مون تننگ کن پوسکن آ بنداو تیا آسراتی دوبریک، امریکن کمپنی پاکستانی کمپنی بی ایف بائیو سائنسز ءِ کوروناوائرس نا دوا جوڑ کننگ نا موکل تسنے، دنیا ءِ اِرا ملک ءِ دوا جوڑ کننگ نا اجازت ءِ پاکستان داٹی سرفہرست ءِ، GILEADسویلی ایشیا ء نا پنچ مینو فیکچررز آتون معاہدہ کرینے، دا گام گیج پاکستان نا جان جوڑی نا بشخ، زرگزرانی و سفارتکاری نا پڑاٹ اہم پیش رفت اسے۔ جمعہ نادے آ وزیراعظم نا خصوصی کمکار جان جوڑی ڈاکٹر ظفرمرزا، خصوصی کمکار واپار عبدالرزاق داؤد ، فارماسیوٹیکل کمپنی نا سروک عثمان خالد، نیشنل کمانڈ اینڈ آپریشن سینٹر اٹ میڈیا ءِ حوال تسرہ۔ خصوصی کمکار جان جوڑی ڈاکٹر ظفرمرزا پارے کہ کوروناوائرس نا ناجوڑ آتے کن بھلا پیش رفت دادے کہ کوروناوائرس نا ناجوڑ آتادرمان کن گچین دوائی دریافت مسنے، امریکی کمپنی گلیڈ اینٹی وائرل دوائی ریمڈ یسیورنا پاکستان ءِ جوڑ کننگ نا موکل تسنے، مہالو دا دوائی امریکہ ٹی کمپنی جی ایس آئی تیار کریکہ، پاکستانی مینو فیکچررز بی ایف بایو سائنسز لمیٹڈGILEADتون معاہدہ کرینے۔ یو ایس ایف ڈی اے نا کنڈآن آزموندہ ئی بنداو آ دوائی نا کاریم اٹ اتنگ نا موکل تننگاسس۔ اوپارے کہ 8 مئی آ جاپانی کمامدارآک ہم دا دوائی نا منظوریءِ تسوسر۔ ڈرگ ریگولیٹری اتھارٹی نا منظوری آن پد کمپنی دوائی جوڑ کننگ نا بناءِ کیک ، ڈرگ ریگولیٹری اتھارٹی اولیت بنداو تیا کانودی کارروائی آن پد کمپنی ءِ دوا جوڑ کننگ نا موکل ایتک۔ سلاہکار واپار عبدالرزاق داؤد پارے کہ حکومت GILEADسائنسز نا لائسنسنگ نا اہم گام گیج آتا ستاءِ کیک، دا گام گیج پاکستان نا جان جوڑی نا بشخ ، زرگزرانی و سفارتکاری نا پڑاٹ اہم ءُ پیش رفت اسے، دا گام گیج آن پاکستان اٹی کورونا نا ناجوڑ و ہیلتھ ورکرز آتے دین اتون مون تننگ کن پوسکن آ بنداو تیا آسراتی دوبریک، پاکستانی ادارہ معاہدہ نا رداٹ 127 ملک آتے دوائی فراوان کیک۔ ساڑی حالیت آتے ٹی پاکستان نا فارماانڈسٹری کن برآمد آتا بشخ اٹی اہم وارخواہی فراوان کیک۔ اوپارے کہ پدتموک ملک آتے ٹی دوائی نا برآمد آن ہیلتھ انا بشخ جہانی کہول آ پاکستان نا پوزیشن ءِ گچین کننگ نا ہم موقع ملک۔ پاکستان اٹی کورونا بچفنگ دوائی تیار کروک آ فارماسیوٹیکل کمپنی نا سروک عثمان خالد پارے کہ کوشست ءِ کہ دواکم آن کم نہاد آ دوبرے۔
