اسہ لکھ ڈاکٹرز، نرسز وپیرامیڈیکل اسٹاف ءِ تربیت و کمک فراوان کننگک
اسلام آباد۔ 15 مئی (اے پی پی) وزیراعظم نا خصوصی کمکار جان جوڑی ڈاکٹر ظفر مرزا حکومت نا کنڈآن ہیلتھ ورکرز آتا رکھ و است بڈی کن پوسکن آ پروگرام نا بناءِکرے وخت اس کہ دا پروگرام نا رداٹ اسہ لکھ آن زیات ڈاکٹرز، نرسز و پیرامیڈیکل اسٹاف ءِ تربیت و کمک فراوان کننگک۔ جمعہ نادے آ پروگرام نا بنائی دود آن تران کرسا ڈاکٹر ظفرمرزا پارے کہ کوروناوائرس اٹ کاریم کننگ اٹ بروک آ مشکل آتے مون آ تخسا ہیلتھ کیئر ورکرز آتے کن جندی رکھی گڑا(پی پی ای) نا آب اٹ کاریم اٹ اتنگ نا بابت اسہ خصوصی آن لائن ہیلکاری کورس اس ڈیزائن کننگانے۔ دا کورس انا مسخت مچ آ پاکستان آن اسہ لکھ آن زیات ڈاکٹر، نرس، پیرامیڈیکس و سپورٹ اسٹاف ءِ اوار کننگ نا ءِ۔ وی کیئر پروگرام غٹ صوبائی وزیر جان جوڑ آتون اواری اٹ جوڑ کننگانے و داٹی ننے غٹ صوبہ غاتا کمک دوئی ءِ۔ اوپارے کہ دا پروگرام صوبائی حکومت و ڈویلپمنٹ پارٹنرز آتا ہندا چرجوئی ٹی کروک آ کاریم تے مون آ دننگ نا اسہ مرحلہ اسے۔ آخبت و براہ راست بنداو تیا جندی رکھ انا گڑاتا فراوانی دا پروگرام نا اسہ اہم ءُ بشخ اسے و این ڈی ایم اے داکاریم ءِ جوانی اٹ سرترننگ ءِ۔ اوپارے کہ دا ہیلکاری کورس انا مسخت بشخ ہلوک آتے متعدی چاگڑد اٹ تینا رکھ اکن پی پی ای نا کڑد انا اہمیت ءِ پاننگ و زموار وڑاٹ رکھی گڑاتا کاریم اٹ اتنگ نا بارواٹی معلومدار فراوان کننگ ناءِ۔ اوپارے کہ دا تربیت کن آب اٹ قومی نصاب تیار کننگانے ومچ آ پاکستان اٹی بڑزکو میڈیکل یونیورسٹی( ہرصوبہ ٹی اسٹ ) ءِ تینا علاقہ غاتے ٹی تربیت تننگ کن گچین کننگانے۔ داپروگرام اٹی وزارت جان جوڑی ءِ یونیسیف ، جہانی ادارہ جان جوڑی و آئی سی آرسی نا کمک دوئی ءِ۔ داوخت آ جہانی ادارہ جان جوڑی نا نمائندہ پاکستان ڈاکٹر پلیتھا مہیپالا، ہیلتھ سروسز اکیڈمی نا وائس چانسلر ڈاکٹر اسد حفیظ، شہید ذوالفقار بھٹو میڈیکل یونیورسٹی نا وائس چانسلر ڈاکٹر تنویر خالق، خیبر میڈیکل یونیورسٹی نا پروفیسر ارشد جاوید، آغاخان یونیورسٹی نا ڈین پروفیسر عادل حیدر، فاطمہ جناح میڈیکل یونیورسٹی نا وائس چانسلر عامر زمان خان و کوئٹہ غان پروفیسر سکندر ریاض خان ہم تران کرے۔
