ننے دین ءِ توروئی ہم ارے و مخلوق نا زرگزرانی رکھ ءِ ہم کروئی ءِ
اسلام آباد۔ 15 مئی (اے پی پی) بنجائی وزیر ڈٹ بندی، شونداری، اصلاحات و خصوصی گام گیج اسد عمر پارینے کہ ننے دین ءِ توروئی ہم ارے و مخلوق نا زرگزرانی رکھ ءِ ہم کروئی ءِ ، ملک اٹی کوروناوائرس نا دین تالان ضرور ارے ولے وس آن پیشن متنے، حکومت نا کنڈآن بیرہ منہ ہفتہ ٹی 80 لکھ خاہوت آتے ٹی سد ارب روپئی بشخانن، بجلی نا بل، پاکستان نا بزغر و جان جوڑی نا بشخ آتون اوار ایلو ریلیف پیکج دافتیان بیدس ءُ، داحالیت آتیان سرسہب مرسا نن ہمووخت آ پیش تمنگ کینہ ہراتم نن سیوت و سخا اتون اواری اٹ چلینگنہ، ہر چار آ صوبائی حکومت آک، آزاد کشمیر و گلگت بلتستان نا حکومت آک اواری اٹ کاریم کننگ ءُ۔ جمعہ نادے آ قومی اسمبلی ٹی کوروناوائرس آ شرہ ءِ چٹفسا بنجائی وزیر اسد عمر پارے کہ گڑاس تقریر آتے ٹی جوان ءُ سلاہ بس ۔ امیر حیدر ہوتی گچین ءُ سلاہ تس و سوج ہم چست کرے۔ اوپارے کہ پاننگاکہ اگہ شش ہفتہ کن ملک ءِ پین بند کرینہ تو دین تالان متوکہ۔ اوپارے کہ سوب اس ارے تو دین امریکہ، برطانیہ، چین، اٹلی و اسپین اٹ تالان مس۔ اوپارے کہ برطانیہ سخت لاک ڈاؤن کننگ نا فیصلہ ءِ کرے ہرا کیہی ہفتہ غاتسکان چلینگاداسہ نرمی کننگانے۔ سویڈن پارے کہ زرگزرانی سرجزآتے برجاتخنگ خوانہ۔ بیرہ ٹارگیٹڈ لاک ڈاؤن مرے۔ سویڈن اٹی دہ لکھ انا آبادی آ 350مرک مسنے وخت اس کہ برطانیہ ٹی دہ لکھ انا آبادی آ 500 آن زیات مرک مسنے۔ اوپارے کہ ہراوخت اسکان ویکسین دریافت مف تو ننے داڑتون زند ءِ تیر کروئی ءِ۔ مچ آ دنیا داسہ ہموڑے سرمننگ ءِ ہراتم دا دین انا بناغان پد وزیراعظم عمران خان ملک انا نیزگار سفید پوش نیامی تپہ نا ہیت ءِ کرے۔ اسہ اندازہ اس خلنگاکہ اسہ کروڑ 80لکھ خاہوت آتا روزگار زہمی مسنے۔ ننے مخلوق ءِ زرگزرانی بدحالی آن ہم بچفوئی ءِ و اوفتا روزگار ءِ ہم برقرار تخوئی ءِ۔ اوپارے کہ امریکہ ٹی اسہ دے اٹی دونیم آن مسہ ہزار مرک مسکہ و امریکی حکومت 40ریاست آتے ٹی لاک ڈاؤن نرم کننگ نا ہیت ءِ کرے ہرانا مسخت مخلوق نا روزگار نا رکھ ئس۔ نن دیکی نا تہاری تقلید ءِ کپنہ۔ پاکستان اٹی جہانی کہول آ دینی مرض انا چاہندار و مصنوعی ذہانت نا ڈیٹا چاہندار ارے نن اوفتا سلابت اٹ فیصلہ کینہ۔ اوپارے کہ پاکستان نا الس زمواری نا شاہدی ءِ تسنے۔ کیس آک ودانو ولے وس آن پیشن متنو۔ اوپارے کہ مئی و جون اٹی کیس آک ودرہ۔ مننگ کیک مرک آک ہم زیات مریر۔ ہسپتال آتے ٹی زیات مخلوق ہم بننگ کیک۔ ولے حتمی وڑاٹ داسہ ہچ پاننگ مفک۔ ننے دین ءِ توروئی ءِ کو مخلوق نا زرگزرانی رکھ ءِ ہم کروئی ءِ۔ اوپارے کہ چاہندار آتا سلاہ تے مون آ تخسا جان جوڑی نا نظام اٹی اصلاحات اتنگ اُن۔ مہالو بیرہ ننتون اِرالیبارٹری ئسر داسہ ننتون ہروڑنا ازباب آتیان شپ 70لیبارٹری ءُ ۔ نن اسہ ہزار آن زیات وینٹی لیٹر آتا ودکی ءِکننگ اُن۔ ٹیسٹنگ نا آسراتی ہڑدے 15 ہزار اسکان سرمسنے۔ اسہ لکھ ڈاکٹر و نرس آتے پی پی ایز نا کاریم اٹ اتنگ نا بابت تربیت ایتنہ، اوپارے کہ ہسپتال آتا آئی سی یوز آتا پنچ ہزار عملہ نا تربیت ءِ ہم کننگ انگ ءِ۔ داحالیت آتے ٹی غٹ آن اہم کڑد پاکستان نا شاری ناءِ۔ ہراوخت اسکان نن رکھی گام گیج آتیا عمل کرسا کینہ حالیت آک وس اٹ مریرہ ۔ احتیاط اتون اوار اوار آن دعاہم کرسا کروئی ءِ۔ اوپارے کہ 22 کروڑ الس ءِ بند کننگ نا جاگہ غا ٹیکنالوجی نا کاریم اٹ اتسا دینی علاقہ غاتے بند کننگ جوان ءِ۔ 500 علاقہ غاتے ٹی ہندا کارروائی ءِ کننگا۔ بیرہ منہ ہفتہ ٹی 80 لکھ خاہوت آتے ٹی 100 ارب روپئی بشخانن۔ 50 ارب روپئی آ مبنی بجلی نا بل آتے ٹی ریلیف تننگ انگ ءِ ہراڑآن چنکا کاروبار و چنکا صنعت آک فائدہ ہرفنگ کیرہ۔ داکان بیدس پاکستان نا بزغر آتے کن پنجا ارب روپئی نا پیکج اس تننگ انگ ءِ و پنجا ارب نا پیکج جان جوڑی نا نظام ءِ گچین کننگ کن تننگ انگ ءِ۔ ملکی آبادی نا 80 درسد بشخ وڑانا وڑاسے ٹی حکومتی گام گیج آتیان فائدہ ہرفک۔ اوپارے کہ دامرض انا مقابلہ ءِ کننگ اٹ ڈاکٹر، طبی عملہ ، پولیس ، رینجرز، ضلعی انتظامیہ، بنجا و صوبہ غاتا جان جوڑی نا عملہ بے مثل کارکڑدگی نا درشانی ءِ کرینو۔ این ڈی ایم اے نا عملہ ہم خراج تحسین نا حقدار ءِ۔
