اسلام آباد۔ 15 مئی (اے پی پی) بنجائی وزیر بین الصوبائی رابطہ ڈاکٹر فہمیدہ مرزا پارینے کہ کوروناوائرس نا دین انا سوب آن ملک ءِ مون تروک چیلنج آتیان کشنگ کن غٹ صوبہ غاتے ٹی بریبری پالیسی نا گرج ءِ، ہراوخت اسکان صوبائی فنانس کمیشن ءِ ٹہیفنگپک ہمووخت اسکان صوبہ غاتا پدسلوک آ علاقہ غاک این ایف سی کمیشن نا بھرم تیان فائدہ ہرفنگ کپسہ۔ جمعہ نادے آ قومی اسمبلی ٹی گپ وتران کرسا بنجائی وزیر ڈاکٹر فہمیدہ مرزا پارے کہ کورونا دین آن ملک ءِ بھلا چیلنج آتا مون تروک ءِ دا حالیت آتے ٹی ننے نیشنل فوڈ سیکورٹی، تعلیم و جان جوڑی نا بابت غٹ ویل آتے قومی اقتصادی کونسل نا کمک اٹ ایسر کروئی مریک انتئےکہ صوبہ غاتون ہچ ءُ وڑوڈول اس اف۔ اوپارے کہ ہراوخت اسکان صوبائی فنانس کمیشن جوڑ مفک این ایف سی نا بھرم تیان صوبہ غاتا پدسلوک آ علاقہ غاک فائدہ ہرفنگ کپسہ۔ اوکوروناوائرس نا بابت غٹ صوبہ غاتے یونیفارم پالیسی اختیار کننگ نا گرج آ زور شاغا و دا دین انا برخلاف برسرپیکار ڈاکٹر و طبی عملہ ءِ خراج تحسین پیش کرے۔
