مچی، مسیت و مارکیٹ آتا بابت پک کروک ایس او پی و گائیڈ لائن تیا عملدرآمد کرفنگ نا پارت کرینے
اسلام آباد۔ 14 مئی (اے پی پی) نیشنل کمانڈ اینڈ آپریشن سینٹر(این سی او سی) نا روچہ مبارک نا پدریسہ 20 می دیوان پنچ شنبے نادے آ این سی او سی ٹی اڈ ہلک۔ دیوان نا کماشی ءِ بنجائی وزیر ڈٹ بندی، شونداری، اصلاحات و خصوصی گام گیج اسد عمر کرے۔ فورم ءِ غٹ صوبہ غاک مچی، مارکیٹ و رش والا ہند آتا بابت تازہ انگا حالیت آتیان معلومدار کریر۔ این سی او سی نا رداٹ دیوان اٹی بنجائی وزیر داخلہ فورم ءِ پارے کہ تدوک آ دے پیداوار پارت جاری کریسس کہ مچی ، مسیت و مارکیٹ آتا بابت پک کروک ایس او پی و گائیڈ لائن تیا عملدرآمد کرفنگے۔ کوروناوائرس (کوویڈ۔ 19) نا گمانی تالانی نا کساس و داوخت انا ڈیٹا ءِ مون آ تخسا این سی او سی ہسپتال آتے ٹی ساڑی کٹ، وینٹی لیٹرز و ایلو آسراتی تا سرجم جاچ ءِ ہلک۔ جان جوڑی آسراتی تا جاچ ءِ ہلنگ نا مسخت ڈیٹا یکجا کننگ، ہسپتال آتا لائخی ءِ معلوم کننگ نا ءِ۔ دیوان آن تران کرسا بنجائی وزیر اسد عمر پارے کہ ڈیٹا پک کروک مرے داڑکن صوبہ و ہسپتال انتظامیہ نا اہم ءُ کڑد اسے، صوبہ و انتظامیہ دارداٹ شاندار کاریم سرانجام تننگ ءُ۔ ہندا ترندی اٹ مون آ ہنوئی ءِ۔ اوپارے کہ تدوک آدے صوبہ و ضلع غاتا کہول آ کوروناوائرس نا تالان مفننگ کن ایس او پی تیا عملدرآمد است بڈ ءِ۔ کوروناوائرس نا تالان مفننگ و الس نا رکھ اکن جوڑ کروک آ ایس او پی و گائیڈ لائن تیا عملدرآمد ءِ پک کرسا جان جوڑی و رکھ ءِ پک کننگ مریک۔ دیوان اٹی کوویڈ۔ 19 نا تازہ انگا حالیت، صوبائی کہول آ ایس او پی و گائیڈ لائن تیا عملدرآمد اٹ پیش رفت نا ہم جاچ ءِ ہلنگا۔
