آزاد کشمیر اٹی یوم حضرت علی آ جلوس کشنگپک، ختم القرآن نا دود آتا جاگہ غا بیرہ دعا مریک
اسلام آباد۔ 14 مئی (اے پی پی) وزیراعظم آزاد کشمیر راجہ فاروق حیدر خان نا کماشی ٹی آزاد کشمیر نا غٹ مسلک آتیان تعلق تخوک آ عالم دین تا نشست اٹ اہم فیصلہ کننگا، دا فیصلہ غاتا رداٹ آزاد کشمیر اٹی یوم حضرت علی نا وخت آ ہچ ءُ جلوس اس کشنگپک، مچ آ آزاد کشمیر اٹی ختم القرآن نا دود آتا جاگہ غا بیرہ دعا کننگک، اعتکاف اٹی ہم کم مخلوق تولرہ، عئید انا نماز مرکزی مسیت آتون اوار اوار غٹ جامع مسیت و ہراڑے المی مرے ایلو مسیت آتے ٹی ہم خواننگ انگ مریک۔ داڑے جاری اعلامیہ ٹی پاننگانے کہ وزیراعظم دا وخت آپارے کہ آزاد کشمیر مذہبی رواداری نا گچین ءُ مثال اسے، غٹ مکاتب فکر آن تعلق تخوک آ عالم دینک مشکل وخت اٹی ننا راہشونی ءِ کریر و پبی کمک کریر۔ روچہ مبارک نا آخیریکو عشرہ ٹی پک کروک ایس او پی تیا عملدرآمد کرفنگک۔ عالم دینک پاریر کہ وزیراعظم آزاد کشمیر راجہ فاروق حیدر خان نا کنڈآن چست کروک آ گام گیج آتیا پورو پت انا درشانی ءِ کینہ، آزاد کشمیر اٹی گچین حکومتی گام گیج آتا سوب حالیت آک پورو کنٹرول اٹی ءُ۔
