بھارتی فورس آک ضلع بڈگام نا علاقہ نسلہ پور اٹی اُراتیٹی پترینگسا بیدادی، ورناتے ہلنگ ءُ، مشعال ملک

اسلام آباد۔ 14 مئی (اے پی پی) حریت راہشون یاسین ملک نا اُرائی مشعال ملک پارینے کہ مقبوضہ کشمیر اٹی بھارتی ریاستی دہشت گردی برجاءِ، بھارتی فورس آتا ضلع بڈگام نا علاقہ نسلہ پور اٹی بربریت کاٹم آن گرینگا۔ پنچ شنبے نادے آ داڑے تینا جاری بیان اٹی اوپارے کہ آر ایس ایس نا سیخا ٹی بھارتی فورس آک نسلہ پور اٹی لٹ وپل کننگ ءُ ، بھارتی فوجی غنڈاک نسلہ پور اٹی 27 دوکان تا قلف آتے پرغسا لٹ وپل کریر،بھارتی فورس آک اُراتیٹی پترینگسا مخلوق آ بیدادی کننگ ءُ۔ مشعال ملک پارے کہ بھارتی فوجی غنڈاک 8 سد آن زیات اُراتیا خل خوکریر، بھارتی فورس آتا خل خوآن اُراتے بھاز نسخان رسینگانے، بھارتی فورس آتا خل خو آن 42 ماڑی تے زیات نسخان رسینگا۔ مشعال ملک پارے کہ بھارتی فورس آک نسلہ پور اٹی شاری تا 162 گاڈی تے نسخان تسر۔ بھارتی غنڈہ فورس آک کشمیری ورناتے ہَلنگ ءُ۔