کوئٹہ۔ 13 مئی (اے پی پی) یارو آن پشین اسکان روڈ تفوک آ کمپنی نا کنٹریکٹر پارینے کہ وزیراعلیٰ بلوچستان جام کمال و کمانڈرسدرن کمانڈ نا کنڈآن رکھ و فنڈ آتا وخت آ باوری کرفنگ آن پد انشاء اللہ 20 جون اسکان روڈ انا تفنگ ءِ پورو کننگک، ہراڑآن پشین و ایب وکیب انا لکھ آ مخلوق ءِفائدہ رسینگک۔ داڑے تینا جاری کروک اسہ بیان اسے ٹی اوپارے کہ یاروآن پشین اسکان دورویہ روڈ انا تفنگ الس نا متکن آ خواست ئس ساڑی صوبائی حکومت و کمانڈ سدرن کمانڈ نا جندی کوشست آتے اٹ روڈ انا تفنگ نا کاریم بناکرے ولے گڑاس زموار اسہ سجفوک ءُ ڈٹ اسےنا رداٹ روڈ انا تفنگ اٹ اڑاند شاغنگ نا کوشست کریر۔ اوپارے کہ وزیراعلیٰ بلوچستان جام کمال خان، صوبائی وزیر مواصلات و تعمیرات عارف جان محمد حسنی ، کمانڈ سدرن کمانڈ و سیکرٹری مواصلات و تعمیرات نورالامین مینگل باوری کرفینو کہ روڈ آ کاریم کروک آ مزور ومشینری ءِ ہر وڑ رکھ و ڈٹ اکن وخت آ فنڈ مہیا کننگک اوکان پد انشاء اللہ یاروآن پشین اسکان دورویہ روڈ 20 جون اسکان پورو کننگک ہراڑآن علاقہ نا لکھ آ الس ءِ گچین سفر نا آسراتی دوبریک۔
