چیئرمین سینیٹ صادق سنجرانی پارلیمانی رپورٹرآتے کسبی باندات سرتننگ کن پارلیمنٹ ہاؤس اٹی درکار آسراتی فراوان کننگ نا باوری کرفینے، پارلیمنٹری رپورٹر ایسوسی ایشن

اسلام آباد۔ 13 مئی (اے پی پی) چیئرمین سینیٹ صادق سنجرانی پارلیمانی رپورٹرز آتے کسبی امور سرتننگ کن پارلیمنٹ ہاؤس اٹی درکار آسراتی فراوان کننگ نا باوری کرفینے، پارلیمنٹری رپورٹرز ایسوسی ایشن نا کنڈآن جاری بیان نا رداٹ چیئرمین سینیٹ صادق سنجرانی چارشنبے نادے آ پارلیمانی رپورٹرز ایسوسی ایشن نا صدر بہزاد سلیمی تون اوار پارلیمنٹ ہاؤس اٹی جوڑ میڈیا سینٹر نا دورہ ءِ کرے۔ سینیٹ سیکرٹریٹ نا بڑزکو آفیسر و سی ڈی اے نا ڈائریکٹر ہم داوخت آ ساڑی ئسر۔ بیان نا رداٹ پی آر اے نا صدر بہزاد سلیمی چیئرمین سینیٹ ءِ میڈیا سینٹر اٹ صحافی و کیمرہ مین تیکن درکار آسراتی تابارواٹی حوال تس۔ پریس گیلری پارلیمنٹ نا اسہ اہم ءُ بشخ اسے۔ چیئرمین سینیٹ صادق سنجرانی پارے کہ پارلیمانی رپورٹرز ایسوسی ایشن پریس گیلری نا بابت باندات آتے ریگولیٹ کننگ اٹ گچین کڑد ادا کرینے، پی آر اے کورونا غان ودی مروک حالیت آتے ٹی جاری دیوان تا کوریج نا ایس اوپی اس جوڑ کرسا اوڑآ پورو عملدرآمد کرفینے۔ چیئرمین سینیٹ پارے کہ پارلیمانی رپورٹر آتے کسبی باندات سرتننگ کن پارلیمنٹ ہاؤس اٹ درکار غٹ آسرات تا فراوانی ءِ پک کیک۔ چیئرمین سینیٹ پارلیمنٹ ہاؤس نا میڈیا سینٹر نا اپ گریڈیشن نا پرمان جاری کرے۔ سینیٹ سیکرٹریٹ و سی ڈی اے کمامدار و پی آر اے نا سلابت اٹ میڈیا سینٹر نا اپ گریڈیشن نا پلان ءِ زوت گڈیکو دروشم اس ایتے۔ چیئرمین سینیٹ پارت کرے کہ پارلیمنٹ میڈیا سینٹر اٹی انت آسراتی اس درکار ءِ فراوان کننگے۔ صادق سنجرانی پارے کہ ایلو مرحلہ ٹی میڈیا سینٹر نا ودکی و انٹرویوز کن اسٹوڈیو نا جوڑ کننگ نا آپشن آ ہم سجفنگک۔ سینیٹ سیکرٹریٹ و سی ڈی اے کمامدار، پی آر اے نا سلابت اٹ میڈیا سینٹر نا اپ گریڈیشن نا پلان ءِ حتمی دروشم اس ترسا زوت چیئرمین سینیٹ ءِ رپورٹ پیش کیرہ۔