بنجائی وزیر ڈٹ بندی، شونداری، اصلاحات و خصوصی گام گیج اسد عمر نا نیشنل کمانڈ اینڈ آپریشن سینٹر نا دیوان اٹی پارت

اسلام آباد۔ 13 مئی (اے پی پی) نیشنل کمانڈ اینڈ آپریشن سینٹر(این سی او سی) ٹی 9مئی آن پد انا حالیت آتا جاچ ءِ ہلنگ کن چارشنبے نادے آ اہم دیوان اس اڈ ہلک۔ صوبائی چیف سیکرٹریز آک تینا صوبہ و علاقہ غاتے ٹی انسداد کورونا وائرس (کوویڈ۔ 19) نا گائیڈ لائںز تیا عملدرآمد نابابت فورم ءِ پیش رفت آن معلومدار کریر۔ بنجائی وزیر اسد عمر صوبہ غاتے پارت کرے کہ ایس او پی آ عملدرآمد ءِ پک کرسا الس نا جان جوڑی و رکھ ءِ پک کننگ کن تینا پبی کڑد ءِ ادا کیر تانکہ دین ءِ پین تالان مننگ آن توننگ مرے، انفرادی زمواری اجتماعی جان جوڑی، رکھ و کوویڈ۔ 19 آن بچفنگ نا اسٹ انگا ذریعہ ءِ۔ این سی او سی نا رداٹ دیوان نا کماشی ءِ بنجائی وزیر ڈٹ بندی، شونداری، اصلاحات و خصوصی گام گیج اسد عمرکرے۔ دیوان ءِ پاننگاکہ الس ءِ رکھی ایس او پی تا بابت معلومدار کننگاسس۔ السی زمواری ءِ کہ او تینٹ رکھی گام گیج آتیا عملدرآمد ءِ پک کیر، عئید انا سوب آن بازار تیٹی رش ودانے، دامعاملہ چکار نا چاری ءِ۔ دیوان آن تران کرسا بنجائی وزیر اسد عمر پارے کہ الس نا آسراتی کن لاک ڈاؤن اٹی نرمی کننگانے، دین انا تالان مننگ نا خطرہ داسکان ساڑی ارے، رکھی ایس او پی تیا عملدرآمد ءِ پک کننگے۔ اوپارے کہ انسداد کوروناوائرس ایس اوپی تے غٹ صوبہ غاتیا گدریفنگانے، ریڈیو، ٹی وی چینلز، سوشل میڈیا تون اوار ہر ڈیجیٹل پلیٹ فارم انا کمک اٹ گچین السی آگاہی مہم اس چلیفنگے، صنعت و تعمیراتی بشخ انا بابت پروٹوکول، مارکیٹ آتون اوار ہر بشخ اکن جامع ایس او پی جوڑ کننگانے، الس دافتیان پورو معلومدار ءِ۔ بنجائی وزیر اسد عمر پارت کرے کہ صوبائی چیف سیکرٹریز مسٹ آن چار دے اٹی پک کروک ایس اوپی تیا 100درسد عملدرآمد ءِ پک کیر تانکہ دین انا مستی تالان مننگ ءِ توننگ مرے۔ 9 مئی آن پد الس نا زمواری ءِ کہ او غٹ ایس او پی تیا عمل کرسا نئے بیرہ تین تون گنڈوک بندغ، خاہوت، راج و کمیونٹی ن اجان جوڑی نا خیال ءِ تخر۔