اسلام آباد۔ 11 مئی (اے پی پی) وزیراعظم نا سلاہکار خزانہ ومحصولات ڈاکٹر عبدالحفیظ شیخ پارینے کہ سخت مالیاتی نظم و ضبط انا سوب جاری مالی سال اٹی نن 3 درسد ودوکی نا گمان کرینہ ولے دین آن پد ودکی نا ہدف آتا دوئی کننگ ممکن اف، جاری حالیت آتا سوب ودوکی نا شرح منفی اسٹ آن منفی اسٹ ٹک پنچ اسکان سلنگ نا گمان ءِ۔ پڑک 20فورم آ پاکستان وام تا ری شیڈولنگ نا مخ تف ءِ۔ اوداہیت ءِ دوشنبے نا دےآ داڑے پاکستان اٹی جرمنی نا سفیر برن ہارڈسٹیفن شالجیک، فرانس نا سفیر ڈاکٹر مارک بیریٹی و فرانسیسی سفارتخانہ نا اقتصادی قونصلر اینز بوئٹرے تون اڑدہی ٹی پارے۔ ڈاکٹر عبدالحفیظ شیخ سفارتکار آتا خیرمقدم ءِ کرے و اوفتے کورونا وائرس نا جہانی دین انا رداٹ ملک انا جم اقتصادی منظر نامہ و آخبت اٹی زرگزران آ گمانی زہم تیان معلومدار کرے۔ اوسفارت کار آتے پارے کہ دین آن مست پاکستان نا زرگزران سوگوی نا کنڈآ ہناکہ، حکومت حسابات جاریہ نا نسخان نا مون ءِ توننگ اٹ سرسہبی دوئی کریسس، سخت مالیاتی نظم وضبط انا سوب جاری مالی سال اٹی نن 3درسد ودوکی نا گمان کرینہ ولے دین آن پد ودوکی نا ہدف آتا دوئی کننگ ممکن اف۔ جاری حالیت آتا سوب ودوکی ناشرح منفی اسٹ آن مفنی اسہ ٹک پنچ اسکان سلنگ نا گمان ءِ۔ ڈاکٹر عبدالحفیظ شیخ سفیر آتے راج انا نیزگار و نزور تپہ غاتے کن وزیراعظم نا احساس پروگرام نا رداٹ کمکی پیکج و چنکا و درمیانہ درجہ نا کاروبار نا مون آ دننگ کن حکومت نا کنڈآن چست کروک آ گام گیج آتیان معلومدار کرے۔ درملکی سفیر آک وزیراعظم نا سلاہکار تون پڑک 20 انا کنڈآن وام تا ری شیڈولنگ و پین وام تا بابت باندات آتیا گپ وتران کریر۔ وزیراعظم نا سلاہکار پارے کہ پڑک 20فورم آ پاکستان وام تا ری شیڈولنگ نا مخ تف ءِ انتئے کہ پاکستان سمجھک کہ نیزگار ملک آتے دا کمکاری نا روا وڑاٹ گرج ءِ دُن تو پاکستان دا ریلیف آن کم فیض یاب مسنے۔ اوپارے کہ چین، سعودی عرب و متحدہ عرب امارات تون اوار چندی ملک آتا واجب الادا 1.8 ارب دالر نا وامک ری شیڈول مسنو، پاکستان دا وخت اسکان کمرشل وام تا ری شیڈولنگ نا درخواست ءِ کتنے۔ اوپارے کہ وزارت خزانہ ودکی وام تا ڈٹ بندی ٹی ڈیبٹ لمیٹیشن ایکٹ نا رداٹ گام گیج کیک انتئے کہ پوسکن آ وام تا اسہ بھلو بشخ اس متکن آ وام تا ادائیگی آ خڑچ مریک۔ ڈاکٹر عبدالحفیظ شیخ دوست ملک آتا کنڈآن کمکاری نا سلہ غا ہڑتوم آ ملک آتا منت واری ءِ ہرفے و دااومیت نا درشانی ءِ کرے کہ پاکستان، فرانس و جرمنی نا نیام اٹ کمکاری آن ہر مسٹ آ ملک آتا الس ءِ اسہ وڑ فائدہ رسینگک۔
